Oznur Deger

 

MÊRDÎN - Medya Aslan a dimayê 8 serran serbest ameye veradayîş va: “Armancê ma yê sereke azadîya Rayberê ma yo. Wexto ke Rayberê ma azad bibo, heme tepiştiyê sîyasî zî azad benê. Ma behsê başbîyayîşê şert û mercan nêkenê, ma behsê azadkerdişê heme tepişteyê sîyasî kenê.”

 

Medya Aslan a dimayê heşt serran Zîndanê Cinîyan a Kayserî Bunyanî ra ameye veradayîş, ercnayîşê xo yê binpaykerdişê heqê merdiman û şert û mercê zîndanî ser o pare kerd.

 

‘Zîndan de cuyayîşêke rêxistinkerde est o’

 

Medya Aslan ke 24ê Temmuze 2018ine de wextê ke Wan de kampanyayê weçînayîşî kerdêne ameye tepiştiş, dadgeha ke Wan de ameyîne muhakemekerdiş kerdiş bi tohmetê “endamîya rêxistine” 10 serrî cezaya zîndanî ci rê ameye birnayîş. Dimayê ke 3 serran Zîndanê Girewte yê Tîpa Tyê Wanî de mende, Medya Aslan semedê Zîndanê Cinîyan ê Kayserî Bunyan de ameye neqlkerdiş. Medya Aslan zîndanî sey “caardişêk xidar” name kerd û qetî kerd ke pêwa şert û mercê xidarê zîndanî zî, zîndan akademî û “wareyê Rayberîye” bî. Medya Aslan dîyar kerd ke zîndan de cuyayîşêke rêxistinkerde est o û va: “Moralê ma her tim berz o. Her çiqas ê biwazê moralê ma vînî bikerê zî, nêeşkenê û ma bi heme hawayî têkoşînê xo domnenê. Grevê vêşanîyê demêk dimayê ke ma kewtî zîndan dest pêkerdî. Û ma 1ê Adara 2019ine de beşdarê grevê vêşanîya bêpeynî û bêagêrayîşî bîyî. Ma semedê cewabdayîşê prosesî, zext û tecrîdî dest bi grevê vêşanîye kerd. Armancê sereke yê na çalakîye şikinayîşê tecrîdê Rayber Apo ser bî. Heta ke Rayber Apo azad nêbo, tu tepişte azad nêbeno, tu kesê ma azad nêbeno.”

 

‘Ganî azadîya Rayber Apo pê bêro’

 

Medya Aslan qetî kerd ke ê prosesê “Aştî û Cimatê Demokratîk” nêzdî ra taqîb kenê û va: “Rayber heme barê prosesî girewt xo ser. Nê hetî ra barê ma zî giran o. Ma heme wazenê cewabê nê prosesî bidê. Nê hetî ra sey tepişteyêk ke zîndan ra ameya veradayîş, ez amade ya ke rolê xo kay bikerî û berpirsyarîyê xo nê prosesî de bi ca bîyarî. Serewedaritiş û xoverdayîşê şarî hemverê hêrişê Rojawanî ser o moralêk pîl da ma tepiştiyan. Prosesê Rojawanî tewr zêde tesîr ma tepişteyan ser o kerd. Hiş û zerrîya ma her tim Rojawan de bî. Ganî azadîya Rayber Apo pê bêro û ganî no têkoşîn nê eksenî ser o aver şêro.”

 

‘Şert û mercî xirab ê’

 

Medya Aslan dîyar kerd ke 45 tepişteyê cinî zîndan de est ê, va şert û merc baş nîyê û xeylêk tepişteyê nêweşî est ê û va: “Xeylêk hevalê ma yê nêweşî ma dir bîyî, labelê nêeşkayîne derman bibê. Şert û mercê pakitî çin o. Hevalê ma mecbûr bîyî ke firaxan lavaboyê tuwaletî de bişûy û her çiqas ma bi dewamî waşt ke ê tezgeyêk bîn saz bikerê zî, înan waştişê ma red kerdî. Ma her wina waşt ke têlê pencereyan ser o bêrê wedarnayene. Semedo ke asmên û roj bi temamî mîyanê nê têlan de nimite bî û no tewirê tecrîdî bî. Labelê çi heyf, çîyêk nêvurya. Werd xeylêk xirab o, lêşin o û her gamî zere ra çî vejêno. Ancî, yew problemê ma yo tewr gird nêbîyayîşê dermankerdişê tepişteyê nêweşan bî.”

 

‘Ma azadîya tepişteyan wazenê’

 

Medya Aslan tewr peyîn wina va: “Armancê ma yo sereyîn azadîya Rayberê ma yo. Wexto ke Rayberê ma azad bibo, heme tepişteyê sîyasî zî azad benê. Ganî tewr lez wextî de bingehêk sîyasî yê qanûnî û demokratîkî de gamî bêrê eştiş. Netîceya proseso ke Rayberê ma 27ê Sibate de dest pêkerd de, Têgêrayîşê Azadîye xeylêk gamî eştî, labelê dewlete hema heme gamê lazimî nêeştê. Nê semedî ra, ganî gamê qanûnî yê verbiçimî bêrê eştiş. Ma behsê başbîyayîşî nêkenê; ma behsê azadkerdişê heme tepişteyanê sîyasîyan kenê. Vernîya heme çî, ganî heme tepişteyî, Rayberê ma ra dest pêbikerê, bêrê veradayîş.”