Buşra Turan 

 

WAN – Hemsereka SES’î ya Wanî Fîgen Çolakoglu da zanayîş ke semedê xizmetê weşîye Kobanê bidê, muracatê wezaretê weşîye û Walîtiya Rihayî kerdê labelê hema cewabêk nêameyo dayîş û va: “Rewşa destur bêro dayîş de ma do xebatê xo bidomnê. Labelê nika hema cewabêk semedê desturî nêameyo dayîş. Ma hema paweyê cewabî yê.”

 

HTŞ, DAIŞ û komê paramîlîter yê piştîdayîşê Tirkîya dir 6ê Çeleyî de hemverê Sûrîye û Rojawanî de hêrişî da destpêkerdiş û qirkerdiş pê ard. 30ê Çeleyî de mîyanê Îdarekarîya Xoser û Hukmatê Şamî de peyman ame îmzakerdiş. Labelê Kobanê de ablûqa hema dewam keno û hetê xoresnayîşê xida, derman û xizmetê weşîye de problemî yenê ciwîyayene. Hetkarîyê Tirkîya û Kurdistanî ra ameyê komkerdiş bi 25 tirî şirawitî Pirsûs. 26ê Çeleyî de zî Yewîya Tabîbê Tirkî û Sendîkayê Kedkarê Xizmetê Weşîye û Cimatî (SES) semedê xizmetê weşîye Kobanê de bidê muracatê wezaretê weşîye û Walîtiya Rihayî kerdî. Labelê hema cewabêk nêameyo dayîş.

 

Hemsereka Sendîkayê Kedkarê Xizmetê Weşîye û Cimatî (SES) yê Wanî Fîgen Çolakoglu derheqê babete de qisey kerd û veng da ganî berê Murşîtpinarî bêro akerdiş û va ke ê semedê hetkarîya Kobanê amade yê.

 

‘Semedê hetkarî şêrê waştişê ma virazîya’  

 

Fîgen Çolakoglu da zanayîş ke berê sînorî yê Murşîtpinarî yê mîyanê Kobanê û Tirkîya de girewto û va çarçeweya heqê cuye û huqûqê mîyanneteweyî de ganî hetkarîya merdimî nêrê astengkerdiş û wina va: “Rastîyêka ke açaryaya şerê zereyîn, xeylêk welatî tewr bîyê, Tirkîya zî hetkarî dana. Awe, ceyran, çin ê. Serdêk şîdet est o û merdişê tutan yenê ciwîyayene. Şer ça beno wa bibo çi heyf rijnayîş xo dir ano. Sivîlî, nêweşî, tut û heme merdimî bi tesîr benê. Nê semedî ra ganî hemverê heqê cuye rêzdarî bibo. Semedê sivîlanê uca ganî hetkarî biherikîyo. Hetkarîya semedê sivîlanê uca muhîm a. Ma sey sazgehê weşîye cuye pîroz vînenê. Ma her tim her felaketî de têkoşîn danê. Ma waşt ke Tirkîya çarçeweya peymana Cenevreyî de berê sînorî abikero û hetkarî biresno şarê uca.”

 

‘Ma wezaretî ra agahî pawenê’

 

Fîgen Çolakoglu eşkera kerd ke semedê wareyê xizmetê weşîye yê Kobanê de muracayê wezaretê weşîye kerdê labelê hema cewabêk nêameyo dayîş û wina dewam kerd: “Ma muracatê xo kerd. Tirkîya de xeylêk sazgeh, heyet û komeleyê weşîye est ê. Na babete de xebatêka hempar est a. Semedê berê sînorî bêro akerdiş ma paweyê cewabê wezaretî yê. Semedo ke ma xizmetê weşîye Kobanê de bidê ma muracatê wezaretê weşîye û Walîtiya Rihayê kerd labelê hema cewabêk nêame dayîş. Rewşa destur bêro dayîş de ma do xebatanê xo bidominê. Labelê nika hema cewabêk semedê desturî nêame dayîş. Ma hema paweyê cewabî yê.”

 

‘Ganî exlaqê şerî bibo’

 

Fîgen Çolakoglu bal ant tesîrê şerî yê sivîlan ser û wina va: “Çîyê yenê ciwîyayene binpaykerdişê huqûqê şerî yo. Koçberbîyayîşêk gird est o. Agahîyê ke 200 hezarî zêdeyêr kesî koçber bîyê est ê. Belkî na hûmare ra zêdeyêr o. No yeno çi mana? No manaya ke merdimî nê şertê zimistanî de xo nêresnenê lazimîyê merdimîye. Xoresnayîşê awe, xida orte ra wedaryayo. Nê semedî ra tutî, kal, pîr û cinî problemêk pîl ciwîyenê. Ma vanê ke ganî exlaqê şerî bibo, hêrişê sivîlan ser o bêrê vindarnayîş. Ganî astengî orte ra bêro wedarnayene.”