MERKEZÊ XEBERAN- Îran de protestoyê vera şertanê xiraban ê ekonomî û kêmîya xizmetî pêroyî de dest pêkerdî û hewt rojî yo dewam kenê 1 ci ra tut 8 kesî dinyaya xo bedelnayî.

 

Îran de protestoyê hetê esnafê Sûka Tehranî yê heverê kêmbîyayîşê erjê riyalî yê hemverê dowîzî û zêdebîyayîşê vayîya çîyan ame destpêkerdiş, seranserê welatî de vila bî. Protestoyî bazarê telefonê cêban de dest pêkerd, dima ra vila bi bajaranê sey Karac, Şîraz, Îsfehan, Meşhed, Kirman û Keşmê û rojanê peyîn de zanîngehan de zî protesto yenê organîzekerdiş. 

 

Dimayê ke zanîngehan de zî protesto ameyî organîzekerdiş Serekkomarê Îranî Mesut Pezeşkiyan vizêr eşkerayîyêke da û eşkerayîye xo de dîyar kerd ke zanîngeh û sazgehê dewlete bi sebebê ‘’teserûfê enerjîya’’ demkî ameyê padayîş.

 

Îran ku enflasyon resayo se ra 52 û riyal hemverê dolarî kewto sewîyeya 1 milyon û 400 hezarî, nameyê kesê ke protestoyê ke bi şeş rojî yondewam kenê de dinyaya xo bedelnayê ameyî eşkerakerdiş. Bajarê Fuladşehirî yê Îsfahanî Daryuş Ansarî Bahtiyarvend (37), bajarê Kuhdeştî yê Lorestanî Emir Hesam Hudayariferd (22), bajarê Eznayî Şayan Esedullahi (28) û Mustafa Fallahi (15), Çarmahal û Lordegana girêdaye Bextiyarî Ahmed Celil (21) û Seccad Valameneş Zilayi (28) û bajarê Mervdeştî yê girêdayeyê eyaletê Fars zî Xodadad Şirvani dinyaya xo bedelnayê. 

 

Endîşe est ê ke hûmara kesê ke dinyaya xo bedelnayê zêde bibê û ame neqlkerdiş ke çarçewaya protestoyan de heta nika 29 welatijî ameyê destbendkerdiş.