WAN – Sêvê Demîr ya ke rayîrê aye heqîqet bîye, têkoşînê ke pey xo de verda her cayî de berz beno.

 

Qezaya Sîlopîyaya Şirnexî de qedexeyê vecîyayîşê teberî yê 14ê Kanûne 2015ine de ame îlankerdiş zaf merdimî ameyî qetilkerdiş. Proseso ke qedexeyî domîyayîne de 4ê Çeleyê 2016ine de endama Meclîsê Partî (PM) ya Partîya Herêmanê Demokratîkan (DBP) Sêvê Demîr, endama Partîya Demokratîk a Şaran (HDP) û aktîvîsta Kongreya Cinîyan a Azad (KJA) Fatma Uyar û hemsereka meclîsê şarê Sîlopîya Pakîze Nayir bi guleyê ke wesayîtê zirxî ra ameyî rijnayîş, ameyî qetilkerdiş. Hîrê cinîyê têkoşer vîrê şarî de ca girewtî.

 

Têkoşîno ke bi persê ‘çira ma rê wina kenê?’ dest pêkerd

 

Sêvê Demîr dewa Şûtî ya Stewreyê Mêrdînî de 1977ine de ameye dinya. Ê surguno ke hetê dewlete ra kurdan rê yeno ferzkerdiş serranê peyênan ê 90î de vînenê. Keye vernî de şino Amed, dima ra şino Manisa. Pêwa cuya surgunî zî Sêvê fek nasnameyê xo û xebatan veranêdana. Bi persê ‘çira ma rê wina kenê?’ têkoşîn kena.

 

Cinîya bîye serkêş

 

Sêvê Demîr ya ke girêdayê têkoşînê şarê kurdî bîye HADEP, DEHAP, KCD, BDP û DBP de xebatanê xo dewam kerdêne. Hem mîyanê partîyanê sîyasî hem zî têkoşînê cinîyan de cayê xo gêna. Sêvê Demîr eynî demî de DOKH de zî ca girewtêne. Sêvê Demîr warê rêxistinbîyayîş û zanayîşî de tesîrê girdî zaf cinîyan kerd. Heta yena qetilkerdiş têkoşînê xo domnena.

 

Hemverê komployî de têkoşînê xo gird kerd

 

Serra 2002ine de bi hawayêko çalak tewrê xebatan bena. Sêvê semedo ke sey endama Komîsyonê Cinîyan a Kongreya Cimatê Demokratîkî (KCD) xebate kerdêne bi operasyonê binê nameyê “KCK” ameye tepiştiş. 12ê Êlûle 2012ine de semedê wedartişê tecrîdê Rayberê PKKî Abdullah Ocalanî ser o tewrê çalakîya grevê vêşanîye ya bêdem û bêdore bîye. Dimayê vecîyayîşê zîndanî sey endama Meclîsê Partî ya DBPî Şirnex û Mêrdîn de dest bi xebatan kena. 4ê Kanûne 2015ine de di demê qedexeyê vecîyayîşê teberî de şîye herême.

 

Rayîrê aye heqîqet bî

 

Hevalê aye bi vatişê sey ‘Cinîyêka kedkar bî, rayîrê aye her tim heqîqet bî, têkoşînê azadîya cinîyan senîn yenê domnayene, rayîr û metodê ci çi yê? Nê cewabî şexsê aye de estbî. Çi bibo wa bibo hevalanê xo tena nêverdayîne’ qal kenê û yad kenê.

 

Hedef ameye girewtiş

 

Sêvê Demîr tesîro gird zafê hevalanê xo yê cinîyan kerd, dimayê qetilkerdişê aye xoverdayîşê aye bî sebebê girdkerdişê xoverdayîşê cinîyan. Têkoşînê Sêvê Demîr hema zî semedê cinîyan serkêşîye keno. Têkoşîn û ruhê xoverdayîşê Sêvê Demîr her cayê Kurdistanî de yo.