ANQARA - Hemverfeka Komîsyonê Tutan ê DEM Partî Bêrîtan Guneş Altin bi munasebetê Roja Heqanê Tutan ê Dinya dîyar kerd ke tutî yenê kiştiş û heqê înan yenê binpaykerdene û va: “Ma şexsê Ugur Kaymazî de heme tutê ke ameyê qetilkerdene yad kenê û na roje wa heme tutan rê pîroz ba.”

 

Komîsyonê Tutan ê Partîya Têduştî û Demokrasî ya Şaran (DEM Partî) bi munasebetê 20ê Teşrîna Peyêne Roja Heqanê Tutan a Dinya merkezê pêroyî yê partî de beyanat da.

 

Hemverfeka Komîsyonê Tutan ê DEM Partî û Parlamentera Mardînî Bêrîtan Guneş Altin beyanat de dîyar kerd roja heqanê tutan de zî binpakerdişê heqanê tutan domyeno û wina va: “Ma do reyna berpirsîyara dewleta tirkan û dewletanê ke na peymana heqanê mîyanneteweyî îmze kerda, anê vîrê înan.”

 

‘Tutî karanê giranan de xebitiyenê’

 

Hemverfeka Komîsyonê Tutan ê DEM Partî Bêrîtan Guneş Altin îfade kerd ke prosesê ‘Aştî û Komelê Demokratîkî” de ê hewl danê cuyêka newe awan bikerî û wina domna: “Tutî karanê giranan de xebitiyenê û heqê înan yenê binpaykerdene. Ma vengdanê pêroyîya rayedarê dewletan û rayedarê Tirkîyaye kenî ke peynî binpakerdena heqanê tutan bîyarî û perwerdeyê fermî yê bi ziwanê dayîke yê tutan bêro dayine. Ma do bi têkoşînê xo seba ameyoxê tutan û aştîyêka mende saz bikerî.”

 

‘Na roje wa heme tutan rê pîroz ba’

 

Bêrîtan Guneş qiseykerdişê xo wina domna: “Reyna 21ê Teşrîna Peyêne roja qetilkerdişê Ugur Kaymaz û pîyê ey o. Ma bi nê munasebetî heme tutanê qetilkerdeyî yad kenî û soza xo ya têkoşînê adaletî seba înan ancî kenê.  Bi qanûnan wazenê tutan êsîr bigê, wa adalet tutan ê qanûnî newe ra bêrê raştkerdene. Wa tutî nêrê cezakerdene,  îstîsmarê tutan zî bêro cezakerdene. Ma bi bawerîya aştî komelê demokratîkî ke pê bîyarê do tutî biresî heqanê xo, na roje wa heme tutan rê pîroz ba.”