AMED - Bi munasebetê Roja Heqanê Tutan a Dinya, kreş û keyeyê ewnîyayîşî yê Zarokîstanê Perperik ê girêdayeyê Şaredarîya Peyasî çalakîyêka weşe ameye kerdene. Wendekarê zafziwanî yê zarokîstanî bi beşdarê na çalakî bîyê.

 

Serra 1954î ra heta nika 20ê Teşrîna Peyêne Roja Heqanê Tutan a Dinya yena pîrozkerdene. 20ê teşrîna peyêne eynê wextî de serrgêra resnayîşê heqanê tutan o ke 1959î de ameya weşanayene û peymana heqanê tutan a ke 1989î de Cematê Pêroyî ya Neteweyanê Yewbîyayeyan (NY) de ameya qebulkerdene.

 

“Hewteyê Heqanê Domanan” Amed de zî bi programanê zafrengî yeno pîrozkerdene. Şaredarîya Peyasî zî bi sloganê “Domanî bi heqanê xo doman ê” bi programêko rengin keyfê domanan weş kerd. No program do hewteyêk dewam bikero û firsend dano domanan ke heqanê xo bimusê, bi rayîrê kay, atolye, tîyatro û çalakîyanê afernayox bi hewayêko azad û xo ra bawer xoîfade kenê.

 

Mudirîyetê Kreş û Keyeyê Ewnîyayîşî yê Zarokîstanê Perperîk ê Şaredarîya Peyasî derheqê amanc û xebatanê xo de wina vat: “ Ma wazenê tena zanayîşo akademîk nê, eynê wextî de zîhnîyetêko xorîn ê heqanê domanan, domananê xo ser o awan bikerê. Heqo tewr bingeyîn ê domanan o yo ke heqanê xo bizanê û bieşkê bi hewayêko azad xo îfade bikerê. Ma bi nê hereket kenê: “Domanî, bi heqanê xo azad ê.’ Bi xebatanê xo, ma domananê xo xorabawer, haydar û hişyar pîl kenê ke bibê wayîrê ameyoxêko azad.”

 

Kayê zafrengî û çalakîyê afernayoxî yê seba domanan ameyê amadekerdene, eleqeyêka girde vînenê. No program bi tedeyîyanê hîna xurt, do heta peynîya hewteyî dewam bikero û zîhnîyetê gedeyan ê heqan ser o xurt bikero.