Buşra Turan

 

WAN - Hemsereka KURDÎGEHî Arîfe Aslan derheqê hêrişanê ziwanê kurdkî ser o qisey kerd û va: “Kolejê TED’î hemverê ziwanê kurdkî de hêrişêk lêşin kerd. Ma reyna înan şermezar kenê. Cayêk sey Amedî sazîyêk wina çîyêk wina kena. No nêno qebulkerdiş. Na polîtîkaya lêşine ya. Na rewşe bi zanayîş ameye kerdiş.”

 

Sazîyê perwerdeyî û wareyê îstîmlakî de astengîyê ziwanê kurdkî ser vernîya averşîyayîşê demokrasî, têduştî û aştîya komelî de zî astengîyê pîl ê. Kolejê TED’î rojanê verînan de çarçewaya ‘Roşanê Ziwanê Tirkî’ de bernameyêk organîze kerd û fermanê ‘teberê tirkî de ziwan nîno qiseykerdiş’ yê hukumdar Mehmetî ame wendiş û no zî hêrişê nîjadperestî yê hemverê kurdkî reyna ard rojeve.

 

Hemsereka Komeleya Averberdişê Kultur û Ziwanê Kurdkî (KURDÎGEH) Arîfe Aslan derheqê hêrişanê nîjadperestî û muhîmîya ziwanî de qisey kerd.

 

‘Sîstem ziwanê kurdkî qebul nêkeno’

 

Arîfe Aslan bale ant zehmetîyanê ziwanî ser û muhîmîya têkoşînê ziwanî û va: “Kurdkî zaf probleman dir yena rî bi rî. La Vakur de kurdkî yena ciwîyayîş. Ziwanê kurdkî lazim o bibo ziwanê perwerdeyî û bibo wayîrê statu. Semedê nê lazim o têkoşîn bêro kerdiş. Lazim o şar wayîrê ziwanê xo vejîyo. Lazim o komel her wareyî de bi kurdkî qisey bikero. Ê ke ziwanê kurdkî ra hes kenê, semedê nê têkoşîn kenê. Bi rayîrşîyayîş û çalakîyan zaf wareyan de ma xebatî kerdî. Sîstem ziwanê kurdkî qebul nêkeno. Nê semedî ra lazim o şar wayîrê ziwanê xo vejîyo. Têkoşîn nêbo, serkewtiş zî nêbeno.”

 

‘Ma hemverê praktîkanê faşîzan ê’

 

Arîfe Aslan polîtîkayanê zordarî yê kurdkî ser de vinderte û nê çî va: “Kolejê TED’î hemverê ziwanê kurdkî de hêrişêk lêşin kerd. Ma reyna înan şermezar kenê. Cayêk sey Amedî sazîyêk wina, çîyêk wina kena. No nêno qebulkerdiş. Na polîtîkaya lêşin a. Na rewşe bi zanayîş ameye kerdiş. Roşanê Ziwanê Tirkî de na polîtîkaya nîjadperestî ya hemverê tutanê kurdan bîya. Kurdan nê çî qebul nêkerd. Hemverê nê de vindertî. Ma nê praktîkanê faşîzan lanet kenê.”

 

‘Aştî bêziwan nêbena’

 

Arîfe Aslan derheqê prosesê aştî û komela demokratîke de zî qisey kerd û fikrê xo wina ard ziwan: “Wezîfeyê komîsyono ke ame viraştiş no yo ke aştî pê bîyaro. Tu netew bêziwan nêbeno, aştî zî bêziwan nêbena. Bi metodêk sîstematîk meclîs de vengê Dayîkê Aştîye ame girewtiş. Meclîs de wexto ke kurdkî qisey beno, mîkrofonî yenê girewtiş. No hêrişêk hemverê ziwanê kurdkî yo. Lazim o no komîsyon bêhet xebata xo bikero. Lazim o bi baldarî nêzdîyê ziwanî bibê. Her komel bi ziwanê xo est o. Ma kurdî zî bi ziwanê xo est ê.”