Medîne Mamedoglu

 

AMED - Emîne Akturk û Fadîme Yildiz semedo ke bale biancê kanserê memikan ser bi bîsîkletan şîyî bajaran û nêweşanê kanserî dir ameyî têhet. Emîne Akturk û Fadîme Yildiz wina vatî: “Semedo ke ma bale biancê teşhîsê rewî û moral bidê kesanê ke dermankerdişê kanserê memikan vînenê, ma kewtî rayîr.”

 

Goreyê dayeyan, Tirkîya de her serre 15 hezar û 800 cinî rîskê kanserê memikan dir rî bi rî manenê. Aşma teşrîna verêne de çarçewaya xebatanê hişyarîya kanserê memikan de zaf herêman de xebatî yenê kerdiş, perwerdeyî yenê dayîş, kontrolî yenê kerdiş. Emîne Akturk û Fadîme Yildiz zî semedo ke bale bianê na nêweşîye ser, bajar bi bajar bi bîsîklete gêrenê û hişyarî awan kenê.

 

Semedê cinîyan piştdayîş…

 

Nê her di cinîyê ke na nêweşîye kewtê û ameyî dermankerdiş, nê prosesî de bîsîklet ramitê û vatî ke no semedê înan aktîvîteyêk baş bîyo. Her di cinîyan pêwa ke dermankerdişê înan qedîya zî, fek ramitişê bîsîklete ra veranêdayî. Emser Îzmîr ra aşma teşrîna verêne de semedo ke bale biancê kanserê memikan ser kewtî rayîr û 21 rojan de desine bajarî geyrayî û dima ra ameyî Amed. Her herême de semedê cinîyan hetê teşhîsê rewî û piştdayîş de benê hetkar. Her di cinî raywanîya xo do Mêrdîn, Dîlok, Riha û Qibris de dewam bikerê.

 

‘Ma wazenê bibê moral’

 

Emîne Akturk hîkayeyê destpêkerdişê rayîrê xo wina qal kerd: “Hîrê serrî verê bi nêweşîya kanserê memikan kewta. Verî zî mi bîsîklet ramitêne. La dimayê na nêweşîye mi waşt ke ez bigeyrî, xeyalanê xo pê bîyarî. Bi piştdayîşê doktorê xo yê Komeleya Onkolojî yê 9 Eylule, ez hevala xo dir kewta geyrê Başûrê Rojhelatê Anatolîya. Armancê ma no bî ke ma moral û motîvasyon bidê cinîyanê ke dermankerdişê kanserî vînenê.”

 

‘Ma pey xeyalanê xo ra ameyî’

 

Emîne Akturk va ke semedo ke cinîyan dir bêrê têhet kewtî nê rayîrî û pêwa pêro zehmetîyan game peyser nêeştê û wina dewam kerd: “Hobî semedê cuya merdiman muhîm a. Ma waşt ke ma bale biancê nê ser. Çike hobî merdimî cuye dir girê dano û enerjîya cuye yo. Mi rê bîsîklete hobîyêk bî ke merdimî weş kena. Ma hem spor kenê hem zî sey wesayîtê neqlî şuxilnenê. Ma xo azad hîs kenê. Ma kewenê her cayî, ma şinê tebîet. Ma wazenê bi bîsîklete hişyarî virazê. Ma semedê cinîyan vanê ‘pey xeyalanê xo şêrê’.”

 

‘Dayeyê kanserê memikan roje bi roje zêde beno’

 

Fadîme Yildiz zî wina va: “21 rojî yo ma rayîr de yê. Ewro ma Amed de yê. Siba ma şinê Mêrdîn. Dima ra ma şinê Riha, Dîlok, Osmaniye, Edene û Hatay. Bi taybetî ma wazenê moral bidê merdimanê herêma erdlerzî. Ma wazenê hişyarî virazê û bale biancê kanserê memikan ser. Na nêweşî serranê peyênan de zêde bîya. Verî her 8 cinîyan ra yewe de ameyîne vînayîş. Nika zêde bîya. Ma cinîyan dir yenê têhet. Wexto ke ê kêfweş benê, ma xo weş hîs kenê. Ma bi no hawa rayîrê xo de bi hêvî rayîr ra şinê.”