AMED - Rayberê Şarê Kurdî Abdullah Ocalanî konferansê Meclîsê Dayîkê Aştîye rê mesajêk şawit û va: “Bêguman sey dayîk cayê şima xoverdayîşê ma de bêmunaqeşe yo. Labelê, ez nê muhîmî û bawerî da ke qalibê cinîbîyayîş û dayîkbîyayîşî ke cematê adetî ferz kenê, ganî bêrê binpaykerdiş. Şima ganî pey nasnameyê xo yê dayîkbîyayîşî de eynî wextî de nasnameyê cinîya azad û hişmendîya xo dir têkoşîn bikerê.”

 

Dimayê 12 serran, Meclîsê Dayîkê Aştîye 18-19ê teşrîna verênê de Merkezê Kultur û Kongre ya ÇandAmedî ya Amedî de bi vatişê “Dayîkî serkêşê cematê demokratîke û aştîya mende yê” konferansê xo yê 3ine virazenê. Rayberê Şarê Kurdî Abdullah Ocalanî konferansê Meclîsê Dayîkanê Aştîye rê mesajêk şawit.

 

Mesajê Rayberê Şarê Kurdî Abdullah Ocalanî wina yo:

 

“Ez, tewr zaf dayîka xo raştîya ciwîyayîşî, sebrî la tewr zaf zî vindertişî raştî yê serberzî musaya.

 

Ez Dayîkê Aştîye ke wayîrê nê vindertişê serberz û rûmetî yê silam kena û semedê konferansê şima serkewtiş wazena.

 

Cinî senî wazena ganî wina biciwîyo, labelê ganî cesaretê înan ê cuya azad zî bibo. Mi rêzgirewtişê xo yê cinîyan serê prensîbê ‘Ganî azadî bi fikrîyayîş dest pêbikero’ awan kerdo.

 

Şima sey Dayîkê Aştîye ke pawitişê ciwîyayîşî û xoverdayîşê aştîye wareyanê tewr vernî de yê, şima timûtim têkoşînê azadî û aştîya ma de wareyê tewr vernî de cay girewtî. Bêguman sey dayîkî cayê şima di xoverdayîşê ma de bêmunaqeşe yo. Labelê, ez nê muhîmî û bawerî da ya ke qalibê cinîbîyayîş û dayîkbîyayîşî ke cematê adetî ferz keno, ganî bêro binpaykerdiş. Şima ganî pey nasnameyê xo yê dayîkbîyayîşî eynî wextî de nasnameyê cinîya azad û hişmendîya xo dir têkoşîn bikerê. Na cografya ke verê cû cematê dayîkî tesîrdar bî, eynî wextî de cayê nakokî û meselanê cematî yê verênî zî tîya de vejîya yê. Koledarîyê cinîye û koledarîyê cematî bi pê dima rayîr ra şîyê. Eksê ci fikrayîyîşo ke yeno zanayîş, koledarî bi vejîyayîşê dewletbîyayîşî dir nê la bi koledarîyê cinîyan dest pêkerd.

 

Nê nakokî û meselayê cematî ke qewimyayî, çimeyê meselanê ke ma ewro ciwîyenê yê. Rayîra vejîyayîşî na mesela bi pîya awankerdişê cuya komunal û demokratîke yo.

 

Vengê ma yê semedê aştî û cematê demokratîke ke ma 27ê sibate de dest pêkerd, wezîfe û berpirsîyarîyêk barê têgêrayîşê cinîyan û dayîkanê aştîye keno. Serdemo newe dest pêkeno.

 

Rêxistinkerdişê cuya sosyalîstî serê bingehê sîstemê komunalî yê demokratîke bi aştîye mumkun beno. Nê esasî ser o ez heme Dayîkanê Aştîye silam kena û xebatanê înan de serkewtiş wazena.”