Rozerîn Gultekîn

 

AMED - Endama Komîsyonê Derûdorî û Bajarî yê girêdayeyê Baroyê Amedî Yasemîn Ozaydogdu Atli derheqê qirkerdişê ekolojîk ê sere de Amed û Kurdistan de yeno ciwîyayîş erjna û va: “Serra 2019 ra heta nika her serre Amed de bi pêroyî nêzdîyê 100 hebî projeyê rijnayîşî kewenê dewre. Ma sey baro hemverê qirkerdişê ekolojîkî de têkoşîn de yê.”

 

Netîceyê polîtîkayanê şerî yê dewlete de Kurdistan de qirkerdişê ekolojîk bi serran o dewam keno. Eynî wextî de bi polîtîkaya asîmîlasyonî ke Kurdistan de yena kerdiş, hewl danê şarî erdê înan ra dûr bifînê û bê nasname verdê. No proseso ke aştî yena qiseykerdiş de talankerdişê xozaya Kurdistanî dewam kena. Endama Komîsyonê Derûdorî û Bajarî yê girêdayeyê Baroyê Amedî Yasemîn Ozaydogdu Atli derheqê qirkerdişê ekolojîkî de qisey kerd.

 

‘Xoza ra dûrkewtiş, yena manaya xo ra dûrkewtişî’

 

Yasemîn Ozaydogdu Atli eşkera kerd ke herêma Amedî de roj bi roje qirkerdişê ekolojîkî giran beno û no proseso ke aştî yena qiseykerdiş de hemverê xoza de qirkerdiş hîna zî dewam keno. Yasemîn Ozaydogdu Atli wina va: “Wazenê ma dewe, erd û xozaya ma bibirnê û vîrê ma bidê xovîrrakerdiş. Dûrkewtişê xoza, yena manaya xo ra dûrkewtişî ya. Kurdistan bi serran o bîyo herêma binpêkerdişî. Vernî de bi şer xozaya ma ameye xespkerdiş, nika zî hetê şîrketanê petrol û madenan ra yeno xespkerdiş. Pasûr, Licê, Pîran, Şirnex, Cûdî, Agirî, Wan û xeylê cayanê bînan de binpêkerdiş est o. Her roje bi seyan raporê ÇEDî yenê. Semedê projeyan ganî raporê ÇEDî ke serê fealîyetî yê yan nîyê bêrê girewtiş. Eke ÇED pozîtîf bo, dest bi falîyetan kenê. Bêraporê ÇEDî zî tîya de ocaxê xîzî û petrolî de cigêrayîşî dewam kenê.”

 

Raporê ÇEDî yê pozîtîfî

 

Yasemîn Ozaydogdu Atli dîyar kerd ke dewayê ke semedê vindarnayîşê talankerdişê xozayî ameyî akerdiş de qerarê betalkerdişî nêdanê û raporê ÇEDî yê pozîtîf ê. Yasemîn Ozaydogdu Atli wina dewam kerd: “Şîrketo ke wazeno falîyetan bikero ganî raporê Ercnayîşê Tesîrê Derûdorî (ÇED) bigîro. Wexto ke rapor pozîtîf yan zî negatîf netîce bo, şîrket a gore xebatan keno. Na çarçewaya de ma kewenê rayîr û dewayan akenê. La çi ehyf dadgehe qerarê vindarnayîş û betalkerdişî nêdana. Xesp dewam keno.”

 

 

Goreyê peymana mîyanneteweyî tênêgêrenê

 

Yasemîn Ozaydogdu Atli dîyar kerd ke pêwa ke îmzaya Tirkîya binê xeylê peymananê mîyanneteweyîyan ê ke semedê pawitişê xozayî yê est a zî goreyê peymanan tênêgêrenê û wina va: “Tirkîya girêdayê Peymana Berne, Peymana Pawitişê Derûdorî yê Mîyanneteweyî yê Parîsî, Peymana Pawitişê Derûdorî yê Neteweyê Yewbîyaye û xeylê bînan a. La çi heyf Tirkîya goreyê peymanan tênêgêrena.”

 

‘Nika her cayê Amedî de falîyetêk est o’

 

Yasemîn Ozaydogdu Atli peynîya qiseykerdişê xo de wina va: “Dewaya ma ya dewa Pirejmanî dewam kena. Dewaya ma ya derheqê Ocaxa Sifirî ya Licê dewam kena. Dewaya ma ya dewa Çomçelî ya Çinarî dewam kena. Dewaya ma ya derheqê şîrketê petrolî yê dewa Sûrî de dewam kena. Nika her cayê Amedî de falîyetêk est o. Dewijî xo resnenê ma, ma zî hema dest bi têkoşînî kenê. Prosesê Zozananê Hesadînî est o. Bandorê hukmî çin o. Bandorê ke rapor huqûqî yo yan nîyo çin o. Şîrketî yenê dest bi xebatan kenê. Goş nêdanê raporî. Herêma Amedî de nêzdîyê 500 projeyê rijyayîşî bica ardê. Her serre Amed de nêzdîyê 100 projeyê rijyayîşî benê. Ma sey baro hemverê nê de têkoşîn de yê. Nê semedî ra ganî şar xo rêxistin bikero.”