MERKEZÊ XEBERAN - Roj bi roje binpaykerdişê heqê merdiman ê rejîmê Îranî yê hemverê cinîyanê kurdan de zêdeyêr benê. Na çarçewa de tepişteya sîyasî ya kurde Zeyneb Celaliyan teberê ke rewşa aye ya weşîye nêbaş a, la heta nika rayîr nêame dayîş ke bêro dermankerdiş û çimdarîya doktorî de bo.

 

Rêxistina Heqanê Merdiman ê HRNAyî derheqê rewşa tepişteya sîyasî ya kurde Zeyneb Celaliyan ke zîndanê Yezdî yê Îranî de cezaya heta hetayî aye rê ameya birnayîş, raporêk weşan kerd.

 

Rapor de ame dîyarkerdiş ke Zeyneb Celaliyan tepişteya sîyasî ya cinî ya ke hetê rejîmê Îranî ra cezaya heta hetayî aye rê ameya birnayîş û nika zîndanê Yezdî de yena verdayîş. Ame vatiş ke teberê rewşa weşîya Celaliyane ke semedê nêweşîya çiman, gurçikan û mîdeyî xirab a, la hema zî çimdarîya doktorî yê lazimî û dewamî rê bêpar ameya verdayîş.

 

Ame dîyarkerdiş ke wextêk derg o tepişteya sîyasî Zeyneb Celaliyan semedê nêweşîyanê mîde, gurçik û çiman rewşa aye xirab a, la heta nika berpirsyarê zîndanê Yezdî karûbarê lazimî semedê dermankerdişê aye nêkerdê.

 

Rapor de ame dîyarkerdiş ke aşma ke şî de, nêweşxaneyêk bajarê Yezdî de emelîyatêk semedê Zeyneb Celaliyan ame kerdîş, la dimayê di rojan aye ancî berdê zîndan. Ame vatiş ke wextê emelîyatî de zî kelepçe destê Celaliyane de bîyo.

 

Ercê vatîşî yo ke Zeyneb Celaliyan serra 1982ine de bajarê Makoyo ke bajarê Urmiye yê Rojhelatê Kurdistanî ser o yo, ameya dinya. Serra 2007ine de bêfermanê dadwerî, Kirmaşan de ameye destbendkerdiş û 25ê sibate de bi tometê ‘Hewildayîşê hemverê asayîşê nîştimanî û şerê hemverê Homa’ de cezaya daliqnayîşî aye rê ameye dayîş. La dadgeha temyîzî dima ra cezaya aye kerd heta hetayî.