MERKEZÊ XEBERAN - Bi wesîleya 1ê Êlule Roja Aştîye ya Dinya partîyê sîyasî, sazgeh û rêxistinê sivîlî eşkerayîye dayî û vengdayîşê “Hemverê şerî de ma dorê waştişê aştîye de bibê yew” kerdî. 

 

Têgêrayîşê Cinîyanê Azadan (TJA), Partîya Herêmanê Demokratîk (DBP) û Înîsiyatîfê Yewîya Demokratîke bi wesîleya 1ê Êlule Roja Aştîye ya Dinya eşkerayîye da. 

TJA'yî ra mesajê aştîye

 

Têgêrayîşê Cinîyanê Azadan (TJA) bi wesîleya 1ê Êlule Roja Aştîye ya Dinya eşkerayîyêke nuştekî weşêna û va: "Komelî bêazadîya cinîyan, azad nêbenê. Aştîyêke ke serê veng, kede û têkoşînê cinîyan de bo, nêeşkena mende bo. Bi wesîleya 1ê Êlule, ma ancî kenê: Ma hemverê polîtîkayê şerî aştîye, hemverê wêrankerdişê cuye û hemverê serdestî azadî pawenê. Ma bi qerardarî têkoşînê xo yê semwdê aştî û komelêk demokratîk dewam kenê. Bi têkoşînê xo yê rêxistinkerde, bi pêgirewtişê cinîyan ke sînoran derbaz keno û bi rayîrê xo yê ver bi azadî, ma do aştîyêke mende, bi rûmet û têduşt taqîb bikerê.

 

DBP'yî vengdayîşê têkoşînê hempar kerd 

 

Eşkerayîya DBP’yî de îşaret bi şerê Filistîn, Sûrîye û Ûkraynayî ame kerdiş û wina ame vatiş: “Têkoşînê şarê kurdî tena semedê azadîya xo nê, semedê cuyêka têduşt ya demokratîke û aştîyane ya şaran pêrûne ya.” Ame dîyarkerdiş ke çareserîya demokratîke û aştiyane ya meseleya kurdî tena semedê kurdan nê, eynî wextî de semedê ameyoxê hempar ê tirkan, ereban, lazan, çerkesan, elewiyan, êzidiyan û pêro şaran rê xeylêk muhîm o.

 

Înîsiyatîfê Yewîya Demokratîke ra mesajê yewîye

 

Înîsiyatîfî bale ant vengdayîşê “Aştî û Komelê Demokratîk” ê Rayberê Şarê Kurdî Abdullah Ocalanî ser o û nê çîyî vatî: “Şarê Tirkîya 1ê Êlule emserr bi prosesê Aştî û Komelê Demokratîk pêşwazî kenê. Bêguman hêvîya aştî seba heme şaran cayê keyfweşî yo. O semedî ra Vengdayîşê Aştî û Komelê Demokratîk ê birêz Abdullah Ocalanî seba heme temsîlkar, bawerî û şaran berê ameyoxêko aştîyane akerdo. Vengdayîşê ma Dewlet û Hukmatî rê yo ke seba aştîyêka menda û birûmete bi lez gamanê şênberan bierzê. Her gama seba aştî û demokrasî do bawerîya prosesî hîna geş bikero, her game do biba teqezîya çareserîya demokratîke.