ANQARA - Cinîyan, reaksîyon vera xutbeyê Serekîya Karê Diyanetî yê camîyan de dago wendiş û destkewtişê cinîyan hedef gênê, mojnayî. 

 

Meclisê Cinîyan ê Partîya Têduştî û Demokrasî (DEM Partî) û EŞÎK’î reaksîyon vera xutbeyê Diyanetî ke cinîyan û destkewtişê înan armanc girewtêne, mojnayî û bale antî têkoşînê hemverê dişminîya hemverê cinîyan ser.  

 

Meclîsê Cinîyan ê DEM Partî

 

Meclîsê Cinîyan ê DEM Partî, hesabê xo yê medyaya dijîtale yê X’î de eşkerayî da û bale antî xutbeyê Diyanetî yê nê hewtetî yê bi sernameyê “Heqê evdan libasêk adir o” ser û reaksîyon mojnayî û vatî, “Ma do destûr nêdê ke şima xutbeyê camîyan ser destkewtişê cinîyan xesp bikerê û nê siyasetî meşrû bikerê. Kesê bi destê Wezaretê Edaletî huqûqê mîrasî vernîya munaqeşeyî akenê, yê ke bi hemkarîya Dinayetî çim vera dayê heqê ma yê têduştî yê mîrasî wa baş bizanê ke ma do zîhniyetê camêrdê serdest mehkûm bikerê.”

 

Platformê EŞÎK'î

 

Platformê Cinîyan ê Semedê Têduştî (EŞÎK) zî derheqê eynî babete de eşkerayîyêke nuştî weşan kerd. EŞÎK’î dîyar kerd ke xutbeya Dinayetî de cil û belgê cinîyan û cuya înan hedef ameya girewtiş û no nîno qebûlkerdiş. EŞÎK’î hemverê hewldayîşê Diyanetî venga têkoşînê hempar kerd û va ke bê tawîz bidê do têkoşînê xo dewam bikerê.