ŞIRNEX/RIHA- Meclîsê Cinîyan ê DEM Partî yê Şirnexî vera kiştişê cinîyan ê demê peyênî de ke vêş bîyê, rayîrşîyayîş organîze kerd û kiştişê cinîyan şermezar kerd.

 

Meclîsê Cinîyan ê DEM Partî yê Şirnexî vera kiştişê cinîyan rayîrşîyayîş organîze kerd. Parlamentera DEM Partî Sebahat Erdogan Saritaş û Newroz Uysal Aslan û xeylê cinîyî awanîya Platformê Şûbeyan ê KESK’î yê Şirnexî de kom bîyê û bi pankartê “Cinîyê ke ameyê kiştene, sebebê serewedaritişî ma yê” rayra şîyê. Girse heta Qada Cumhurîyetî bi vatişê slogananê, “Cinî cuye azadîye”, “Kiştişê cinîyan polîtîk o” rayra şîyî. Meş uca de qedîya û eşkerayî ameye dayene

 

Verfeka Cinîyan a DEM Partî ya Şirnexî Esma Erener eşkerayî wende. Erentaş bale ante kiştişê cinîyan ser o ke aşma temmuze de ameyê kerdene û wina vat: “Aşma temmuze de 31 cinî ameyê kiştene û zafêrê 30 cinî zî bi hewayêko guman cuya xo vîndî kerda. Kiştişê nê cinîyan de para dewlete zî est a. Seba dewlete bi qanûnanê xo kiştixan pawena.”

 

‘Ma xoverdayîş girs bikerê’

 

Eşkerayî ra pey Newroz Uysal Aslan qisey kerd û aye da zanayene ke kiştişê cinîyan polîtîk o û nê çîyî vatî: “Kurdîstan û Tirkîya de her roje cinî yenê kiştene. No kiştiş riyê qanûnanê dewlete yê camêrdpawitoxan ra yo. Ma sey Meclîsê Cinîyan ê DEM Partî heta peynî do hemverê kiştişê cinîyan xover bidê û xo rêxistin bikerê.”

 

Eşkerayîye bi sloganê “Jin jiyan azadî” peynî bî.

 

Riha

 

Riha de, Meclîsê Cinîyan ê  DEM Partî û Têgêrayîşê Cinîyanê Azadan (TJA) verê Parkê Novada yê qezaya Haliliye de çalakîyêke organîze kerdî. Çalakîya ke xeylê cinî beşdar bî de, pankartêk bi nuşteyê "Rewistinbun xweparastina me ye" ame wedaritiş. Hemsereka bajarê Rihayî ya DEM Partî Ayşe Surucu va, her roje di cinî yenê kiştiş û qanûn înan nêpaweno û verdeno ke bimirê. Ayşe Surucu dîyar kerd ke cinîyê Kurdistanî bi polîtîkayê şerê taybetî yenê hedefgirewtiş û va, "Şerêk taybetî hemverê cinîyan de yeno kerdiş. Sûcdarê bi cilanê yewreng bi polîtîkayê bêcezaverdayîşî yenê pawitiş. Ma do her ca semedê peynîkerdişê şîdetê cinîyan ser o têkoşîn bikerê."

 

Eşkerayîye bi sloganê "Jin jiyana azadî" peynî bî.