MERKEZÊ XEBERAN - Rojnamegerê Wargehê Multecîyan ê Mexmûrî, bi eşkerayîyêke reaksîyon vera hedefgirewtişê Rojnameger Nazim Daştan û Cîhan Bîlgîne mojnayî û vatî: “Ma îşxalkerdiş û hêrişan ra nêtersenê. Çi kenê wa bikerê, ma do her wareyî de taqîbkerdoxê heqîqetî bibê.”

 

19ê kanûnê de rojnameger Nazim Daştan û Cîhan Bîlgîne ke averşîyayîşê Vakur û Rojhelatê Sûrîye taqîb kerdêne, netîceya hêrişê bi SÎHAyî yê dewleta tirkan de serê rayîrê mabêne Awbendê Tişrînî û bajarokê Sirînî de ameyî qetilkerdiş. 

 

Rojnamegerî û roniştoxê Wargehê Multecîyan ê Şehîd Rustem Cûdî (Mexmûr) bi eşkerayîyêke reaksîyon vera hedefgirewtişê Rojnameger Nazim Daştan û Cîhan Bîlgîne mojnayî. Eşkerayîye Mala Gel de bi deqeyêk rêzgirewtişî ameye destpêkerdiş. Badê rêzgirewtişî rojnamegere Bêrîvan Tunç qisey kerd.

 

Bêrîvan Tunçe destpêkê qiseykerdişê xo de sersaxî semedê keyeyanê rojnamegeran rê waşt û vat: “Prosesêk wina ke cuya şaran bi seyan serrî yena vurnayîş de seranserê Kurdistanî şarê kurdî rastê hêrişan yeno. Destkewtişê şorişê Rojawanê Kurdistanî ke bi gonî û têkoşînê kêna û xortê şarê kurdî ame bidestkerdiş, ewro binê îşxalkerdişê dewleta tirkan û çeteyanê ci de yo. Meslegdarê ma  Nazim Daştan û Cîhan Bîlgîne yê ke waştî rewşa Vakur û Rojhelatê Surîye dinya rê neql bikerê û hemverê çapemenîya îqtîdarî ke rewşa bîyaye bi hawayêkê eksê ci danê, raştî eşkera bikerê hetê dewleta tirkan ra ameyî qetilkerdiş. Ma do tim pey rayîrê înan û heqîqetî de bibê.”