Bi hezaran şênî ji bajarên Sirîn, Minbic, Girêspî, Tebqa û Herêma Cizîrê ji bo pîrozkirina roja Kobanê ya cîhanê di salvegera xwe ya 3’emîn de berê xwe dan Kobanê. Şahî li Qada Qehreman Egîd  û bi coşeke mezin hat li darxistin. Jinên ku hatibûn  pîrozbahiyê hest û nêrînên xwe wiha anîn ziman.

 

Arîn bû hêza serkeftinê!

 

Di destpêkê de cîgira Hevseroka Meclîsa Rêveber a Minbicê Cemîle Ehmed axivî û got:”Di kesayeta qehereman Arîn Mîrkan û Rêvan de ez hemû şehîdan bi bîr tînim. Îro di roja piştgiriya Kobanê de em dibînin ku hemû Netew careke din kombûne û vê rojê pîroz dikin. Dema ku gel bi xwe bawer be û  xwe li ser piyan bihêle wê hemû êrîşan bişkînin. Çawa ku Kobanê, Girêspî û Reqa ji DAÎŞ`ê rizgar bûn û îro jî berê şervanên azadiyê li Dêrezorê ye û di dema pêş de jî em ê bi van hemû netewan li bajarê Dêrezorê jî werin gel hev û em ê pîrozbahiyê çê bikin. Îro kombûna ewqas gel cihê kêfxweşiyê ye, em îro careke din hemû gel li bajarê Kobanê kom bûn û govenda azadiyê digerînin."

 

Şervanan bi canê xwe axa xwe bi dest xistin!

 

Her wiha Endama PYD`ê Şemse Ehmed jî axivî û diyar kir ku Kobanê bi berxwedana YPJ/YPG bi ser ket û got: "Em îro çiqas hestên xwe bînin ziman kêm e.  Ji ber ku Kobanê kolanek mabû ku bi destên dijmin bikeve. Lê bi berxwedana YPJ/YPG û berxwedana Arîn Mîrkanan dijminê me di Kobanê de têk bir. Dewleta Tirk digot 'Kobanê ket û wê bikeve' lê me dît ku Kobanê bi ser ket û azad bû. Îro em li şervanên azadiyê û Gelê Kobanê mêze dikin ku  îro bi awayekî azad di kolanên ku şer tê de bi dijwarî çêbûye û me şehîd daye  azad dijîn."

Şemsê di dawiya axaftina xwe de wiha got:” Têkoşîna azadiya Kobanê bi saya fikir û felsefeya Rêber Apo pêk hat û îro divê ku em heta  ku Rêberê me azad bibe em têbikoşin.”

 

Hevgirtina Kobanê bû bingeha federaliyê!

 

Di heman demê de Endama desteya Rêveber a Federasyona Demokratîk a Bakûrê Sûriyeyê Derya Remzan axivî û destnîşan kir ku berxwedana Kobanê bû bingeha gelek projeyên serkeftî û wiha got: "Îro roja ked û berxwedana şervanan e. Li Kobanê çawa ku hemû pêkhateyan bi hev re şer meşandin îro jî hemû pêkhate li gel hev in, dest bi dest ber bi projeyeke Demokratîk û rojeke azad ve dimeşin. Ji ber ku Roja Kobanê ya cîhanê bû bingeha gelek projeyên di Rojava û di Bakûrê Sûriyeyê de. Kobanê bû nimûneya berxwedanê û rêbaza têkoşîna li hemberî sîstema rejîma desthildar."

 

‘Em coşa xwe diyarî hemû gelan dikin’

 

Di dawiyê de dayîka Kobanê Leyla Omer ku bi bi cil û bergên gelêrî tevlî şahiyê bûbû hestên xwe wiha anî ziman: "Em bi coşa jinê bi cilên xwe yên gelerî hatine şahiya pîrozkirina 1`ê Mijdarê. Di bin dilopên baranê de bi tevahî gelên ku xwedî li roja Kobanê derketin ez wan pîroz dikin. Em coşa xwe diyarî hemû gelan dikin û li Rêber Abdulah Ocalan û jinên ku heta niha tekoşîna xwe dewam kirine û azadiya jinê diparêzin em li wan jinan jî pîroz dikin."