Derya Ren

 

NAVENDA NÛÇEYAN - Hevseroka TEV-DEM'ê Remziye Mihemed li ser biryara hilbijartinê ya ku ji aliyê hikûmeta demkî ya Şamê ve hatiye dayîn, got: "Piştî hilbijartinan, dê ji sedî 70'ê kursiyên ku di hilbijartinan de nehatine girtin werin dagirtin. Ev tayînkirin nikarin gelê Sûriyeyê temsîl bikin. Ew ê demokratîk nebin."

 

Her çend hikûmeta demkî ya Şamê ku piştî hilweşîna rejîma Baasê hat damezrandin, di derbarê pevçûn û kaosê li Sûriyeyê de ti gav neavêt jî, raporên giştî derketin holê ku leşkerên bi cilên hikûmeta demkî ya Şamê û kesên ku amblemên DAIŞ'ê li xwe kiribûn, di gelek komkujiyên li dijî Elewî û Durzî de beşdar bûne. Her çend ev hemû li welat diqewimin jî, li şûna ku rewşê çareser bike, hikûmeta demkî ya Şamê ragihand ku ew ê di navbera 15-20'ê Îlona 2025'an de hilbijartinên parlemanî li dar bixe. 

 

Hevseroka Tevgera Civaka Demokratîk (TEV-DEM) Remziye Mihemed derbarê mijarê de ji ajansa me JINNEWS'ê re axivî. 

 

'Hikûmeta demkî xwe wekî daîmî dibîne'

 

Remziye Mihemed, avakirina hikûmeta demkî li Şamê piştî hilweşîna rejîma Baas bi bîr xist û diyar kir ku hikûmeta demkî xwe wekî daîmî dibîne, lê di pratîkê de ev ne wisa bû û wiha bi lêv kir: "Hikûmeta demkî ya li Şamê niha ji bo hilbijartinan amadekariyan dike, lê ew rê li ber kesên cuda digire ku beşdarî van hilbijartinan bibin. Hikûmet bi awayekî cuda li van cudahiyan dinêre û em her roj bi komkujiyek nû re rû bi rû dimînin. Em nikarin bibêjin ku li Sûriyeyê jiyaneke normal hatiye avakirin. Hikûmeta demkî ya ku hatiye avakirin xwe wekî daîmî dibîne û dest bi xebata ji bo vê armancê kiriye."

 

'Çiqas dê li gorî gel be?'

 

Remziye Mihemed diyar kir ku polîtîkayên nezanînê yên ku ji hêla hikûmeta demkî ve têne meşandin, nakokiyan afirandine û got: "Ev helwest çiqas dê li gorî gelê Sûriyeyê be? Hikûmet çiqas dê ji bo êşên ku gel dikişîne çareseriyek pêşkêş bike? Niha ji ber êrişan komkujî û koçberî heye. Ev mirov di nav vê kaosê de dijîn. Biryara hilbijartinê û paşê dûrxistina hemû kesan ji hilbijartinê, tê wateya henekê. Biryarên hilbijartinê yên ku ji hêla hikûmeta demkî ya Şamê ve hatine dayîn bi tu awayî nûnertiya gelê Sûriyeyê nakin."

 

'Ji bo gel ne demokratîk e'

 

Remziye Mihemed, tekez kir ku Bakur û Rojhilatê Sûriyeyê ji şoreşê vir ve bi awayekî demokratîk tê birêvebirin û wiha axivî: "Gel di nava vê sîstema damezrandî de xwedî avahiyek e ku dikare xwe temsîl bike. Jin û ciwan di nava vê sîstemê de pêşengiyê dikin û rêveberiyê dikin. Sîstema Rêveberiya Xweser a damezrandî hemû cudahiyan digire nav xwe û temsîliyeta xwe nîşan dide. Her çend sîstema demokratîk li herêmên di bin kontrola Rêveberiya Xweser de ewqas baş bicîh bûye jî, biryara ku ji aliyê hikûmeta demkî ya li Şamê ve hatiye girtin dê ji bo gel ne balkêş be û dê demokratîk nebe."

 

'Ev tayînkirin ne temsîliyeta gelê Sûriyeyê'

 

Remziye Mihemed, bi bîr xist ku biryarên hilbijartinê gelek herêm ji holê rakirine û diyar kir ku hilbijartinek ku hemû Sûriyan ji holê radike, dê demokrasî û azadiyê neyne gel û wiha nêrînên xwe anî ziman: "Piştî hilbijartinan, ji sedî 70'ê kursiyan dê ji bo herêmên ku di hilbijartinan de nehatine hilbijartin werin tayînkirin. Ev tayînkirin nikarin gelê Sûriyeyê temsîl bikin. Ji ber vê yekê, kesên tayînkirî dê heman zihniyeta hikûmeta demkî ya Şamê hebin."

 

Serdestiya hikûmeta Sûriyeyê 

 

Remziye Mihemed bi bîr xist ku rejîma Baasê li hember dagirkirina Tirkiyeyê ya Serêkaniyê, Cerablus, Girê Spî, Efrîn, Minbic û Ezazê tu bertek nîşan neda û heman bêdengî di dema avakirina hikûmeta demkî ya Şamê de jî berdewam kir. Remziye Mihemed bal kişand ser civînên di navbera hikûmeta demkî ya Şamê û Tirkiyeyê de û wiha axivî: "Xwesteka Tirkiyeyê ya serdestiya li ser hikûmeta Sûriyeyê bi awayekî zelal xuya dike. Berî her civîneke girîng, Tirkiye bi hikûmeta demkî ya Şamê re hevdîtinan dike. Ji vê em dikarin encama HTŞ bêyî Tirkiyeyê tu gavan navêje, derxin."

 

'Divê zextê li hikûmeta demkî ya Şamê bikin'

 

Remziye Mihemed her wiha got ku divê rêxistinên girseyî yên demokratîk ên navneteweyî li hember biryarên ku ji hêla hikûmeta demkî ya Şamê ve hatine girtin bertek nîşan bidin û wiha dawî li axaftina xwe anî: "Gelê Sûriyeyê têkoşînek mezin dimeşîne. Dema ku em li Bakur û Rojhilatê Sûriyeyê dinêrin, em dikarin bêjin ku avahiyek demokratîk derketiye holê. Ji ber vê yekê, gelê Siwêdayê jî rêxistina xwe ava kiriye. Di heman demê de, peymana ku di 10'ê Adarê de di navbera QSD û hikûmeta demkî ya Şamê de hatiye îmzekirin hîn neketiye meriyetê. Ev derengketin her roj dibe sedema krîzên nû. Ji ber vê yekê, divê hêzên navneteweyî zextê li hikûmeta demkî ya Şamê bikin da ku peymanê bicîh bîne."