STENBOL – Endama Meclîsê Dayîkanê Aştîye Hedîye Duman Stenbol de dinyaya xo bedelnaye. Cenazeya Hedîye Duman do dewa Keferze ya Mîdyadî bêro definkerdiş.

 

Dayîka Aştîye Hedîye Duman Stenbol de dinyaya xo bedelnaye. Cenazeya Hedîye Duman do 4ê çeleyî roja yewşeme dewa Keferze ya Mîdyadî bêro definkerdiş. Dimayê definkerdişê cenazeye do Stenbol de tazîye bêro ronayîş.

 

Hedîye Duman kam a?

 

Hedîye Duman serra 1941ine de qezaya Mîdyadî ya Mêrdînî de ameye dinya. Cuya Hedîye Duman bi têkoşîn derbas bîye. Serranê 1990ine de semedê tedayanê dewlete keyeyê xo ra koçê Stenbolî kerde. Metropolanê Tirkîya de zî têkoşînê welatperwerî û kulturê kurdî ra nêvisîya, heta sanîyeyê peyêne têkoşînê xo domna.

 

Serra 1996ine de Stenbol de bîye endama Meclîsê Dayîkanê Aştîye û uca de têkoşînê xo dewam kerd. Di laj û kênayêka Hedîye Dumane serranê 1990ine de tewrê refê gerîla bîyî. Lajê aye Amed serra 1996ine de Dêrsim de dinyaya xo bedelnaye.