STENBOL - Dayîkê Aştîye serdayîşê şîno ke semedê endamê Heyetê DEM Partî yê Îmraliyî Sirri Sureyya Onderî amebi ronayîş, kerdî.

 

Semedê endamê Heyetê Partîya Têduştî û Demokrasî (DEM Partî) Sirri Sureyya Onder ke badê 18 rojî yê nêweşxaneyî, 3yê gulane de dinyaya xo bedelnaye Merkezê Nawitişî yê Cemal Reşit Reyî de ame ronayîş. Keyeyê Sirri Sureyya Onder, Hemserekê Pêroyî yê DEM Partî Tuncer Bakirhan, Tulay Hatîmogullari, hemserekê Pêroyî yê Partîya Herêmanê Demokratîke (DBP) Çîgdem Kiliçgun Uçar, Keskîn Bayindir, endama Heyetê DEM Partî ya Îmraliyî Pervîn Buldan, sîyasetmedaro kurd Ahmet Turk û parlamenterê DEM Partî serdayîşî qebûl kerd. Cayo ke şîn ameyo ronayîş, fotografê Sirri Sureyya Onderî ameyî daliqnayîş û findî ameyî tavistiş. Defterêk zî ameyo ronayîş û kesê serdayîşê şînî kenê hîsê xo ê defterî de nusenê. Eynî wextî de rêxistinê DEM Partî yê Stenbolî û qezayê ci zî şîn de hazir bî.

 

Serekê Pêroyî yê Partîya DEVA Alî Babacan o yo ke tewr verên ame şin bi. Komeleyê Elewiyan, endam û temsîlkarû partiyê siyasî, hunermend, Avûkatê Buroyê Huqûqî yê Asrinî û xeylêk kesî serdayîşê şînî kerdî. Meclîsê Dayîkê Aştîye yê Stenbolî zî serdayîşê şînî kerdî. Şîn de semedê Sirri Sureyya Onder dua yenê wendiş. Serdayîşê şînî do heta saete 17.00ine dewam bikero.