Neslîhan Kardaş

 

WAN - Merdimê tepişteyan derheqê pêvînayîşê heyetê Îmraliyî ke do wezaretê edaletî dir pê bêro qisey kerd û va: “Çend rey sererastkerdişê înfazî pê ame la tepişteyê sîyasî ci ra feyde nêgirewtî. Ma wazenê ke tepişteyê sîyasî zî bikewê çavçewaya sererastkerdişî. Ma azadîya Birêz Ocalanî û pêro tepişteyan wazenê.”

 

Badê vengdayîşê "Aştî û komelê demokratîkî" ke Rayberê Şarê Kurdî Abdullah Ocalanî kerd, PKK’yî qerarê adirbestî girewt. Hema hetê îqtîdarî ra gamêke nêameya eştiş û bendewarîyê pêroyî zêde bî. Heyetê DEM Partî yê Îmraliyî semedê pêvînayîşê wezaretê edaletî dir xo amade keno.

 

Vernîya pêvînayîşî merdimê tepişteyan waştişê xo ardî ziwan.

 

‘Tutanê mi dir travma awan bî’

 

Cinîya tepişte Avdel Sayin ke 2022ine ra heta nika zîndanê Asayîşê Berzî yê Wanî de tepişte yo, Semîra Zelal Îlter da zanayîş ke mêrdeyê aye wexto ke do bi ameyîne tayînkerdiş, cezaya ey ameya tesdîqkerdiş û va: “Ez bi zor û zehmetîyan şîna zîndan. Semedê tepiştişê mêrdeyê mi, tutê mi heyê psîkolojîk de bi tesîr benê û travma awan bî.”

 

Surgunê zîndanêk bîn kerdî

 

Semîra Zelal Îlter wina va: “Ez ewro şîya pêvînayîş la mêrdeyê mi surgunê Edene kerdê. Vernîya ke  agahî bidê, surgun kerdî. Xora cezaya mêrdeyê mi nêmenda. Surgunkerdiş semedê ma baş nêbî. Ma zehmetîyan ancenê. Qet nêbo ma aşme ra reyke şîne tutê mi babîyê xo vînayîne. Ez bi paştdayîşê keyeyê xo debare kena. Tutê min ê qijî nêeşkenê bixebitîyê.”

 

‘Problemê derman û dermankerdişî ciwîyeno’

 

Semîra Zelal Îlter wina va: “Mêrdeyê mi zîndan de problemê weşîye ciwîyeno. Problemê qelbî ciwîyeno. Problemê derman û dermankerdişî ciwîyeno. Ma nêzanê nêweşîya ey çî ya. Wexto ke ma şî pêvînayîş destê ey tim qelbê ey ser bî.”

 

‘Bi şer tu çîyêk nîno bidestkerdiş’

 

Ayşe Alici zî dîyar kerd ke lajê aye Tarik Alici 10 serrî yo tepişte yo û cezaya muebetî ci rê ameya birnayîş û va: “Lajê mi Silîvirî de bî. Surgunê Balikesîrî kerdî. 8-9 serrî uca de mend. Çend aşmî yo surgunê Burdurî kerdî. Semedo ke dûrî yo ma timî nêeşkenê şêrê. Ez emser şîya. Hêvîya ma aştîye ya. Ma aştî û têduştî wazenê. Do no şer heta key dewam bikero. Wa Birêz Ocalan û tepişteyî azad bibê. Ma bi şer tu çîyêk nêeşkenê bidest bikerê. Tu sûcê lajê mi çinbî. Wexto ke unîversîte wendêne, ame tepiştiş. Bi serran o tepişte yo. Wa pêro tepişteyî bêrê veradayîş. Tu sûcê înan çin o.”