SÊRT- Hemşaredara Sêrtî Sofya Alagaş bi vatişê, “Problemê qeyûman merkezê zûrêk pîl o” reaksîyon vera tayînkerdişê qeyûman mojna û wina vat: “Tirkîya vernê de şarê ke ci dir ciwîyenê xapênena, badê pêro welatanê dinya sey wayîrê demokrasî bo mojnena.”

 

Roniştişê dewaya Hemşaredara Sêrtî Sofya Alagaş ke semedê xebatê wextê rojnamegerîye de bi îdiayê “endamîya rêxistine” ameyîne muhakemekerdiş, vizêrî 5ine Dadgeha Cezaya Girane ya Amedî de ame kerdiş. Dadgehe, 6 serrî û 3 aşmî cezaya hefsî da Sofya Alagaş. Wezaretê Karê Zereyî badê cezaya Sofya Alagaşe, Şaredarîya Sêrtî rê qeyûm tayîn kerd. 

 

Sofya Alagaş ke qeyûm tayînê vera ci ame kerdiş, hemverê tayînkerdişê qeyûmî de reaksîyon mojna.

 

Sofya Alagaş, ard ziwan ke qalê tayînkerdişê qeyûman ameyîne kerdiş û dîyar kerd ke qerar lez û bez ame dayîş û vizêrî zî ceza ameye dayîş. Sofya Alagaş vat, “Ma zanê amadekarîya qeyûman estbî û bi talîmatan na ceza dayê. 24 saetan badê qeyûm ame tayînkerdiş, vernîya ke dewa biqedîyo tu qerarêk bi sebeb nêame nuştiş û îtîraz nêame kerdiş. Ez hema yena muhakemekerdiş, qerarê peynî çin o. La hukmayî nê çî sey sebebêk qeyûman ca ard. Îqtîdar xo rê behaneyêk gêreno û semedê kesê ke dosyaya înan çin a cipersayîşê neweyan akeno."

 

Sofya Alagaş da zanayîş ke Tirkîya dinya xapênena û wina vat: "Problemê qeyûman merkezê zûrêk pîl o. Tirkîya vernê de şaro ke ci dir ciwîyeno xapênena û badê zî pêro welatanê dinya rê sey wayîrê demokrasî bo mojnena.”