27ê teşrîna peyêne 2024ine ra heta nika hêrişê hemverê Vakur û Rojhelatê Sûrîye dewam kenê. Tirkîya bi SÎHA’yan hêrişê Awbendê Tişrînî kena û hemverê nê zî xoverdayîşêk pîl yeno dayîş.

 

Aktîvîsta Têgêrayîşê Cinîyanê Azadan (TJA) Arzu Karaman, derheqê rewşe de qisey kerd.

 

‘Ganî ma şarê Rojawanî dir têkoşîn bikerê’

 

Arzu Karaman dîyar kerd ke Vakur û Rojhelatê Sûrîye de xoverdayîşêk bi heybet yeno kerdiş û vat:  “Bi hêrişê ke yenê kerdiş, sucê şerî kenê. Hetê HTŞ û Tirkîya ra şaro sivîl yeno bombavarankerdiş. Verê pêro çimanê dinya de sûcê şerî yeno kerdiş. Sivîl, cinî, tutî û ciwanî hedef yenê girewtiş. Ganî ma hemverê nê hêrişan de têkoşînê xo pîl bikerê û şarê Rojawanî dir hemverê hêrişan de têkoşîn bikerê. Hêzê kapîtalîstî uca de îdareyê yew kesî wazeno. La no mumkin nîyo. Şarê ucayî goreyê xo form dayo ci.”

 

‘Lazimîya ma bi nê sîstemî est a’

 

Arzu Karman qiseykerdişê xo wina dewam kerd: “Ma venga her kesî kenê ke wayîrê wijdanî bê. Şarê kurdî pêro dinya rê nê îspat kerd ke îdareyê xo yê demokratîk vet werte. Semedo ke şarê kurdî tu sîstemêk dewleta netewe ya kapîtalîst qebûl nêkeno. Wazenê bîyayîşê kurdî û modelê ci werte ra wedarnê. Sîstemo ke Rojawan de ameyo awankerdiş, sîstemêk ke ma pêro hewce yê. Nê semedî ra ganî ma sîstemê xo bipawê.”

 

‘Ma do wayîrê destkewtişan vejîyê’

 

Arzu Karaman wina peynî kerd: “2014ine de Rojawan de şorişê cinî ame kerdiş. Pratîkê 'komelê têduştî' ke ma pawenê vejîya vernî. Uca de cinî û camêrdî her sazgeh de têduşt ca girewtî. Yew hedefê uca zî modelê cinî ke uca de ameyo awankerdiş o. Nêwazenê no model welatê bînan vila bibo. Nê semedî ra tewr zêde cinî uca benê hedef. Ma zanê ke hêrişê Rojawanî hêrişê hemverê şorişê cinî û destkewtişê cinîyan o. Ma do sey cinî destkewtişê ke ma bi bedelê zaf giranî bi dest kerdê, her ca bipawê.”