RIHA - Dîcle Ehmed ke wextê hêrişê DAIŞ’î yê hemverê Kobanê de, Kobanê rojnamegerî kerdêne, dîyar kerd ke xoverdayîşo ke a roje ame dayîş, ewro  Tişrîn de yeno ciwîyayîş û vat: “Senî Kobanê DAIŞ’î rê bî goristan, do Tişrîn zî Tirkîya û çeteyanê ci rê bibo gor. Ma şahidîyê nê xoverdayîşî kenê. Ma do nê xoverdayîşî dinya rê bidê eşnawitiş.”

 

2014ine de DAIŞ’î hêrişê Kobanê kerd û badê 134 rojan dima, bi xoverdayîşêk pîl Kobanê ame azadkerdiş. Şarê kurdî her cayê Kurdistanî de semedê Kobanê vejîyayî meydanan û dorê Kobanê de bîyî xelek. Serekkomarê AKP’yî Tayyîp Erdoganî vat; ‘Kobanê ver bi kewtişî yo’. Hemverê nê vatişî de cinî û şarê Kobanê bi xoverdayîşo ke mojnayî, mohrê xo dayî tarîx ro.

 

Rojnamegere Dîcle Ehmed ke o wext xoverdayîşê hemverê DAIŞ’î de ame dayîş, dinya rê da eşnawitiş, ewro zî Tişrîn de bena vengê xoverdayîşî.

 

Xoverdayîş kerd binê qeydî  

 

Dîcle Ehmed da zanayîş ke ê kesê ke xoverdayîşê Kobanê de dinyaya xo bedelnayî yad kena û vat: “Her kesê ke bi ruhê Kobanê Tişrîn de xo ver danê, silam kena. Ez zî Kobanê ra ya, wexto ke xoverdayîşê Kobanê dest pêkerd, mi rojnamegerî kerdêne. Wexto ke şer dest pêkerd, mi kameraya xo girewte û şîya cepheyê şerî. Mi hewl da xoverdayîşê Şêrwanan ê hemverê DAIŞ'î uca bi kamera tomar bikerî.  Sewbîna mi hewl da ke bimojnî şar senî wareyê xo ra koçber bîyo û senî dej anto. Çîyo ke ma ciwîyayî zaf cîya bî.  Mi dî ke Şervanî senî bi çekêke asayî, hemverê çekê barbar û giran yê DAIŞ’î xo ver danê. Şervanan pêwa pêro bêîmkanî mojnayî ma ke do Kobanê DAIŞ’î rê bibo gor.”

 

Her kerrayê Kobanê de xoverdayîş ameyo nuştiş!

 

Dîcle Ehmed bale ant dîmenanê prosesê Kobanê ser o û vat: “Mi dîmenê ke şervanê ke bi çeka normal hemverê tankêk têkoşîn kenê ant. Xêrcê nê, dîmenê wextê koçkerdişê şarî ez zaf tesîr bîya. Semedo ke şar mîyanê zehmetîyê pîlî ra derbaz bî. Şervanê YPJ-YPG’yî Kobanê de tarîx nuştî. Şervanî vêşan mendî, têşan mendî la her wareyî de têkoşîn kerdî. Her kerrayêk Kobanê ser de tarîxo pîl ê xoverdayîşî ameyo nuştiş. Ma vîna ke senî ciwanê çar parçeyê Kurdistanî herikyayî Kobanê. Bi vatişê Fermandar Peyman ê 'Ma do nêverdê Kobanê bikewo, ma do bibê mertal' çalakîya fedaî est a. Heto bîn ra xoverdayîşê şehîd Zozan û şehîd Erîşî rojawanê Kobanê de yeno kerdiş.”

 

Roja ewilî Kobanê ser kewt

 

Dîcle Ehmet dewam de wina vat: “Kobanê bi vatiş û bawerîya Fermandar Ebû Leyla yê 'Kobanê do DAIŞ û hevalanê cin rê bibo gor' bi ser kewt. Kobanê roja yewin ê hêrişan de ser kewt. Semedo ke a roje her kesî soz dabî ke do xo ver bidê. Şervanî zî vatişê xo ser vindertî û efsaneyê xoverdayîşê Kobanê dinya de vila bî. Ê serdemî de ma xeylêk çî derbaz kerd, ma sey rojnameger mîyanê şert û mercê xeylêk zehmetî de bî, her siba ma xatir yewbînan ra waşt. "Me hewl da ke ma pêwa hûmara kêmî û pêro astengîyê Tirkîya û Başûrê Kurdistanî de bibê vengê xoverdayîşî."

 

'Senî ke Kobanê DAIŞ’î rê bi gor…’ 

 

Dîcle Ehmet bale ant çîyê ke ewro Tişrîn de yenê ciwîyayîş û vat: “Hemkarê DAIŞ'î vatêne, 'Kobanê kewt, do bikewo'. Ewro reyke bîn vano 'Tîşrîn kewt, do bikewo'. La xoverdayîşê 2014-2015ine ê şervanan ewro Tişrîn de yeno dayîş. Hevalê ma yê ke ma vinî kerdê est ê ke bibê vengê raştî. Şehîd Cîhane û Nazim nimûneyê tewr pîlî yê. Ma soz danê pêro hevalanê xo yê şehîdan. Ma do her tim bibê vengê heqîqetî. Hevalê ma yê rojnamegerî hêrişê Tişrînî de birîndar bîyî, la ma do her tim bibê vengê raştî. Senî ke Kobanê DAIŞ'î rê bi gor, do Tişrîn zî semedê  Tirkîya û çeteyê ci bibo gor. Ma do nê xoverdayîşî pêro dinya rê neql bikerê.”