Pelşîn Çetînkaya

 

HATAY - Mexdûrê erdlerzî Hedîye Sayan Çoçen dîyar kerd ke pêwa di serrî erdlerzî ser o derbaz bîyo zî hema problemê pîlî ciwîyenê û vat, tutê xo dir şert û mercê giran de konteynir de têkoşînê cuye dana.

 

6ê Sibate de merkezê ci Mereş erdlerzêk pîl ame meydan û tesîr xeylêk bajaran ser o kerd. Erdlerzî ser o 2 serrî derbaz bî la hema birînî taze yê. Yew bajaro ke tewr zêde zirar dî Hatay bî. Dejê merdiman hîna teze yo. Bajar de beşêk pîlî yê awanîyan rijîya û xesarêk pîl vînayî. Xeylêk welatijî zî hema konteyniran de ciwîyenê. Welatijê ke konteyniran de ciwîyenê dîyar kenê ke problemê pîlan ciwîyenê.

 

Hedîye Sayan Çoçen ke erdlerzî ra tesîr bîbî derheqê prosesê derbaz bîya de ajansê ma rê qisey kerd. 

 

‘Sey qiyametî bî’

 

Hedîye Sayan Çoçen wina vat: “Ma vînîbîyayîşê pîlî dayî. Ma 6ê sibate de bi vengêk pîlî aya bîyî. Ma lerzayî, ma xo eşt teber. Erdlerz nêvindertêne. Ma vat qey qiyamet rawuşto. Vengê her çîyê ke rijyayîne ameyîne. La ma nêeşka çîyêk bikerê. Şewêka zehmet û zor bî. Varan estbî. Dêsî kewtibî wesayîtanê ma ser. Ma nêeşkayîne wesayîtê xo bişuxilnê. Merdimê ma dinyaya xo bedelnayî. Wayê,  bira û biraziyê mi binê xirban de mendibî. Ma bi zor xelas kerd. Keyeyêk pîyê mi dewe de estbî. Ma pêro şî uca û ma çadirî dayî ro. Ma 27 kesî bî. Awe kewtêne çadira ma. Varan varayîne. Cilê ma, nivînê ma şil bîne.” 

 

Konteynir de ciwîyenê

 

Hediye Sayan Çoçen dîyar kerd ke badê çend aşman dima konteynirî ra vejîyaya û wina vat: “Ma hîrê kesî odeyêke qije de yê. Zehmet o. La çadire başêr a. Nê semedî ra ma şukur kenê. Mektebî rijîyayî. Lajê mi nêşî mekteb. Badê konteynira mektebî ameyî viraştiş. Cayê karê mi mektebê lajê mi ra dûrî bi. Mêrdeyê mi zî konteynir de mendêne. Varan vareno. Ceyran yeno birnayîş. Wexto ke ceyran şino ma betanîye erzenê xo ser. Reya 15-20 saetan nîno. Asayîşê ma zî çin o. Merdimê ke kuçeyan de yê reyan konteynirê ma kardî kenê. Ma cinî bi şewe nêeşkenê vejîyê teber. Ma xeylêk bêrîya cuya taxa xo kerda. Ganî ma êdî keyeyan de bica bibê.”