MERKEZÊ XEBERAN - Tepişteyê sîyasî yê Îranî Anîşa Esed Îlahî û Hûra Nîkbext, semedê vindarnayîşê cezaya dardekerdişî ya rojnamegere û aktîvîste Pexşan Ezîzî rê ameya birnayîş, venga her kesî kerdî ke bikewê mîyanê têgêrayîşî.

 

8ê Çeleyî de avûkatê tepişteya sîyasî Pexşan Ezîzî, Emîr Reîsiyan neql kerd ke Dadgeha Berzî ya Îranî cezaya dardekerdişî ke Pexşan Ezîzî rê amebî birnayîş, tesdîq kerd. Sewbîna dîyar kerd ke belgeyê ke înan semedê pawitişê Pexşan Ezîzî pêşkêş kerdibî, hetê dadgehe ra ameyî redkerdiş. Nêrazîbîyayîşê hemverê tesdîqkerdişê cezaya dardekerdişî, roj bi roje zêde benê.

 

Mektuba her di tepişteyanê cinîyan de yena vatiş: “Pexşan Ezîzî sey şîîrêka newe ya û hende bi tesîr a, ganî ma Pexşan Ezîzî bipawê û nê çî sey wezîfeyê xo yê tarîxî bivînê. Ganî pêro hêzê sîyasî hemverê qerarê dardekerdişî bifikrîyê ka raştî zî na ceza bi edalet a yan nê? Ganî çalakîkerê heqê merdiman semedê vindarnayîşê cezaya dardekerdişî ya Pexşan Ezîzî hemleyê cidî bierzê.”