STENBOL - Rojnamegerî Gulistan Dursun, Pinar Gayip û Serpil Unal ke 22ê Kanûne de ameybi tepiştiş, Hepisxaneyê Bakirkoyî ra surginê Zîndanê Marmarayî bîyî.

 

Rojnamegere Gulistan Dursun, mûxabîra Ajansê Xeberan ê ETHAyî Pinar Gayip û mûxabîra Rojnameyê Mucadele Bîrlîgî Serpil Unal ke 22ê Kanûna 2024î de seba fotografanê rojnamegeran Nazim Daştan û Cîhan Bîlgîn ke Rojava de bi SÎHAyê Tirkîya ameybi kiştene, berz kerdbî û ameybi tepiştiş. Her hîrê rojnamegerê cinî Hepisxaneyê Cinîyan ê Bakirkoyî de ameyêne tepiştiş. Komeleya Rojnamegeran a Dîcle-Firatî (DFG) dîyar kerd ke her hîrê cinîyê rojnamegerî bi nameyê ke “ê do berê revîr” qawişî ra ameyê vetiş û dima ra surgûnê Zîndanê Marmarayî bîyî.

 

Ame zanayene ke destûr nêameyo dayene ke rojnamegerî eşyanê xo zî bigîrê xo het. No surgûnkerdiş avûkat û keyeyan rê nêame vatene. Agahkerdişê tepişteyê ke eynî qawîşê de manenê dîyar kerdî ke xebere dayê keye û merdimanê înan ke rojnamegerî ameyê sirgûnkerdiş. Avûkatî ewro serdayîşê zîndanê Bakirkoyî kerdî û derheqê tepişteyan de agahî girewtî. Îdareyê zîndanî dîyar kerd ke tepişteyî ameyî sirgûnkerdiş.