AMED - Fotografê 400 çekê AK-47 yê keleşnîkofan û xeylêk cebilxaneyê ke cipersayîşê Narîn Guran de îdîayê derheqê depoyê çekan ê keyeyê Narîn Guran tesdîq kenê, vejîya werte.

 

Derheqê qetilkerdişê Narîn Gurana 8 serrî ke 21ê Tebaxe de qezaya Rezanî ya Amedî de vînî bîbî û cenazeye aye 8ê êlule de ameye vînayîş, têkîlîyê keyeyê Narîn Gurane dewlete dir amebî munaqeşekerdiş. Ameyîne vatiş ke têkîlîyê keyeyê Gurane dewleta nimite dir est o. Amebî îdîakerdiş ke banê keyeyê Gurane ya dewa Çulî de çeke û cebilxane vejîyayê.

 

Keye de 400 çekê AK-47 keleşnîkof ameyî vînayîş. Goreyê xebera Sozcuyî, ame dîyarkerdiş ke semedê guleyî pas nêgîrê û oksît nêbê, bi potikan ameyê piştiş, semedo ke cebilxane taybetmendîyê xo vînî nêkero, mîyanê qutiyê kremayê fistikî de, beşêk zî mîyanê qutîyê salçeyê plastîkî de û beşêk bîn zî mîyanê torbeyê ardanî de ameyê nimitiş.