Neslîhan Kardaş 

 

WAN -Leyla Bûge ke qezaya Şaxî de ciwîyena û 15 serrîya xo de bi camêrdêk 15 serrî ci ra pîlêr ra ameya zewicnayîş, cinîya ke cuya xo bi têkoşîn dewam kerda ya. Leyla Bûge hem tedaya dewlete û bi tedaya feodal û komelî rî bi rî menda, venga cinîyan kerd ke têkoşînê xo dewam bikerê.

 

Cuya Leyla Bûgeya 49 serrî ke 14 serrîya xo de wexto ke tute bîye, nîşan kena û 15 serrîya xo de camêrdêk 15 serrî ci ra pîlêr dir yena zewicnayîş, tena yew ê nimûneyê rewşa cinîyan ke emrê tutî de yenê zewicnayîş a.

 

Aye giştaneyê engişta xo sey kayî dî

 

Leyla Bûge ke qezaya Şaxî ya Wanî de ameya dinya,  34 serrî verê bi kesêk 15 serrî ci ra pîlêr dir ameya zewicnayîş. Leyla Bûge wina vat: “Ez keyeyêk pîlî ra ya. Wexto ke babîyê mi qerar da ke mi bizewicno, xemê ey nêbî ke o kes kam o. Wexto ke mi nîşan kerdî, teber de mi xo rê kay kerdêne. Giştane mi rê sey kay ameyîne. O wext dadî û xala mi nan viraştêne, ez şîya verê înan û mi vat: “Biewnê mamê mi giştaneyêk da mi. Kesê ke ci dir zewicyaya lajê mamê babîyê mi bi," 

 

'Ez bîya veyve la mi hema nêzanayîne kamî dir zewicyaya’

 

Leyla Bûge dewam de wina vat: “Wexto ke ez newe şîya, her kes salone de roniştebî. Wexto ez şîya  mutbax, her kes huyayîne la wexto ke şîne her kes bêveng bîne. Her kes badê şimitişê qehweyê xo vejîya teber la kesêk nêşi û rewşa keyeyê mi pers kerdêne. Cayêk de zî keyfê ameyîne ke kesêk keyeyê mi ra nas keno. Persanê ey ra mi şerm kerdêne û ey zî ferq kerd û vejîya teber. Badê demêk her kes ame la o camêrd nêame û mi zî vatêne, 'werrekna o camêrd biameyîne’. Semedo ke  ey keyeyê mi nas kerdêne. Badê di rojan melayêk ardî keye ke marayê ma bibirno û badê ez pê hesîya wa ke o camêrd mêrdeyê min o.”

 

'Ez tutanê xo dir pîl bîya’

 

Leyla Bûge 17 serrîya xo de tute xo ana dinya. Leyla wina qal kerd: “Badê ke ez zewicyaya, ez çend serran Îzmîr de menda. Badê ez agêraya Şax. Komî de panc tutê mi est ê û ez înan dir bîya pîl. Tutanê mi wendiş û nuştiş mojna mi. Mi mektebê mîyanên qedêna û dîplomaya xo girewt. Camêrdê mi 15 serrî mi pîlêr bî. Badê di tutê mi virazîyayî, kewt zîndan û demêk derg zîndan de mend.”

 

'Bi xebatanê partîye têkoşînê xo dewam kerd’

 

Leyla Bûge badê ke mêrdeyê aye zîndan ra vejîyeno, dest bi xebatanê partî kena. Leyla Bûge demê xebate de 3 rey yena destbendkerdiş û wina vat: “Hukmatî nêverda ma keyeyê xo de rehetî ronişê. Tewr tay aşmêke ra reyke eştêne keyeyê ma ser. Yan ez, yan mêrdeyê mi, yan zî tutê mi ameyîne destbendkerdiş. Coka ma Şax de xeylêk zehmetî ant."

 

'Ganî cinî teslîmê tu camêrdan nêbê'

 

Leyla Bûge ke nika 49 serrî ya, dewam de wina vat: “Tu wext sere metewênê. Semedo ke zîhnîyetê camêrdî, zîhnîyetê nê sîstemî ra xirabêr o. Ma bi çimanê xo vînenê ke her roje cinî yenê vînîkerdiş û kiştiş. Nê semedî ra ganî ma tu cinî tena nêverdê. Eke cinî yewbînan bipawê belkî vernîya qetlîamê cinîyan zî bêro padayîş. Wa cinî tu camêrdî nêbo û têkoşînê xo dewam bikero.”