Pelşîn Çetînkaya

 

ÊLIH - Sultan Acar ke wexto verê şaredarîye de semedê qeyûm tayînê şaredarîye bî, şîdetê polîsan dir rî bi rî mende û dîyar kerd ke înan bi kaşkerdiş destbend kerdê. Sultan Acar vat, pêwa pêro tedayan zî xoverdayîş dewam keno û sere nêtewênenê.

 

Hetê Wezaretê Karê Zereyî ra 4ê teşrîna peyêne de qeyûm tayînê şaredarîyanê Xelfetî, Elîh û Mêrdînî ame kerdiş. Welatijan vera nê reaksîyon mojnayî, dem bi dem hêrişê polîsan dir rî bi rî mendî. Polîsan bi gazê îsotî, awa şid, mertal û heqaretan hêrîşê welatijê xoverdayoxan kerd. Xeylêk welatijê ke şîdetê polîsan înan rê ame kerdiş, birîndar bîyî, ameyî destbendkerdiş û hîn zî tepişyayî.

 

Yew kesa ke hemverê qeyûmî xo ver da û semedê îradeyê xo verê şaredarî de kom bî û polîsan şîdet Sultan Acare rê kerd JINNEWSî rê qisey kerd.

 

'Hew mî dî ke mi erd de kaş kenê’

 

Sultan Acar ke bi îşkence ameye destbendkerdiş wina vat: "Ez serê sibayî saete 07.30ine de hewn ra aya bîya. Wexto ke ez ewnîyaya telefon ra mi dî ke  qeyûm tayînê şaredarî kerdibî. Mi nêzana senî ez ameya şaredarî, mabêne min û polîsêk de bi qasê metreyekê mesafe est bî. Mi xo uca de vînî kerd, sey ke gonîya mi yena rijnayîş. Hew mî dî ke mi erd ra kaş kenê û 2 rojan destbendkerde menda.”

 

'Hezar rey qeyûm tayînê şaredarî zî bêro kerdiş ma do ancî bigîrê’

 

Sultan Acar, dewam de wina vat: "Wexto ke qeyûm ame tayînkerdiş, mi pers kerd; 'çira çira?' Eke qeyûm tayîn kenê o wext çira weçînayîş kenê? Semedo ke ma şaredarî bi dest bikerê ma bi aşman şuxilênê. Ma bi seyan dinyaya xo bedelnayî. Ez venga Erdoganî kena, ‘eke şima do qeyûm tayîn bikerê, Kurdistan de weçînayîş mekerê’. Amancê înan cîya yo. Semedê ziwanê ma, kulturê ma, hem zî her çî rê qeyûm tayîn kenê. Îradeyê Êlihî ser o qeyûm tayîn kerdî. Îdarekarîyê herêmî semedê kurdan gamêke yê. Erdogan qebûl nêkeno. Hezar rey qeyûm tayîn bikerê zî ma do ancî bigîrê. Ma tu wext peyser game nêerzenê. Heta ke no qeyûm tîya ra vejîyo ma do têkoşînê xo dewam bikerê."

 

Tutîya xo ra şer kena

 

Sultan Acar, ard ziwan ke serra 1980î şer kerda û nika ra tepîya zî dewam kena û vat: "15 serrîya xo de ez ameya Êlih. Mêrdeyê mi partî zanayîne. 44 serrî derbaz bî û şansêke ma yê caverdê çin o. Hezar serrî derbaz bibo zî ne ez, ne zî tutê mi fek vera nêdanê. Serranê 90î de mi mêrdeyê xo zî vînî kerd. Mi soz da ci, 'heta mergî ez o têkoşînê ey dewam bikerî'. Mi ala ey girewt. Tutê mi do pey mi bikewê. Tornê mi do ala ma bigîrê. Çi beno wa bibo, ma kewtê nê rayîrî ser.  Ez kurd a, dayîkêke kurd a, cinîyêke kurd a. Çermê mi tira bikerê zî esteyê mi kurd ê, mezgê mi kurd o.”