ANQARA- Endama Meclîsê DEM Partîye Hebûn Aslan derheqê cînayetê cinîyan ê wextê peyîn de zêde bîyî de qisey kerd û vat: “Her qîrînayîşêk cinî, her vindertişêk xurt û rêxistinbîyayîş û hişmendîyê cinî di vernîya qetilkerdişê cinîyan pado.”

 

Şîdetê cinîyan ser roj bi roje zêde beno û semedê polîtîkayê îqtîdarî îstîsmar û qetilkerdişê cinî û tutan zêde beno. Hemverî nê polîtîkayan de reyke bîn muhîmîyê têkoşînê cinî vejêno werte.

 

Endama Meclîsê DEM Partîye Hebûn Aslan derheqê babete de qisey kerd.

 

Bîyayîşê cinîyan beno sebebê bêtehemulî

 

Hebûne dîyar kerd ke îqtîdarê AKP-MHPyî hewl dano komelî bipelçiqno û hemverê cinîyan de bêtehemulîyêk pîl awan bikero û vat: “Hem wareyê Kurdistanî de hem wareyê Tirkîya de qetilkerdişê û polîtîkayêke wina taqîb kenê. Ma vanê ke no girêdayê sîyasetê îqtîdarî yo. Qetilkerdişê cinîyan yê ke yenê ciwîyayîş, girêdayeyê polîtîkaya îqtîdarî ya. Polîtîkaya bêcezaverdayîşî dir, komelî hîna nerm kenê û vernîya  normalbîyayîşê nê qetilîaman akenê. Her çî destê xo de verdayê. Bi nê cesaretî zî şikdarî qetilkerdişê cinîyan, şîdet û desteştiş dewam kenê.”

 

‘Bi serkêşîya DEM Partî komîsyon ame awankerdiş’

 

Hebûne dîyar kerd, demêk nêzî de bi pêşnîyazîyê DEM Partî de, meclîs de ‘Komîsyonê Cigêrayîşê Şîdetî yê Derheqê Cinîyan de’ ameyo awankerdiş û vat: “Netîceya zêdebîyayîşê qetilkerdişê cinîyan de îqtîdar û muxalefet hemverê rewşe de bêveng nêmendî û pêşnîyazî ameye qebûlkerdiş. No komîsyon do şîdet, vînîbîyayîş, hêrişê hemverê cinîyan cigêrayîş bikero. Ma bawer ke no komîsyono ke bi pêşnîyazîyê DEM Partî û bi qerarê hemkar partîyan ameyo awankerdiş, do xebatanê xo bikero û bibi vengê cinîyan. Do qîrînayîşê cinîyan bieşnawê û vernîya şîdetî padê.”