ANQARA - Hemsereka Pêroyî ya DEM Partî Tulay Hatîmogûllari kombîyayîşê partîya xo de vat: “Muxatabê aştîya Rojhelatê Mîyanên û Tirkîya birêz Abdullah Ocalan o ke binê tecrîdê girankerde yo. Cayê çareserîya meseleya kurdî meclîs o. Tecrîdî wedarnê wa birêz Ocalan vejîyo û qisey bikero. ” 

 

Hemsereka Pêroyî ya Partîya Têduştî û Demokrasî (DEM Partî) Tulay Hatîmogûllari kombîyayîşê partîya xo de meclîs de averşîyayîşê rojeve ercna. 

 

Tulay Hatîmogûllari wina qisey kerd: 

 

“Serê nameyê asayîşê kede û malê komelî diznayî. Xezîneya çend kesê dewlemendî pirrî kerdî. Wezîrê Xezîne û Malîye vano, ‘Projeyê pawitişî bi çimeyan est o’. Şîretê ma her kesî rê o yo ke wexto îqtîdar qalê asayîşê netewî keno, wa her kes destê xo bikero cibê xo û biewno. Destê dizdî yê îqtîdarî cêbê şima de yo yan nê? Ma nê çî rastî vanê, ma bi yarîye nêvanê. Semedê her çîyê ke ci ra vanê, asayîşê neteweyî û destê xo kenê cêbê ma, kenê cêbê welatijan û feqîran. Pîya hemverê feqîrkerdişî ke her ke şino zêde beno wurzê. 

 

Tecrîdî wedarnê wa birêz Ocalan vejîyo û qisey bikero

 

Biewnê, Serekê MHPyî ewro qiseykerdişê koma xo de semedê wedaritişê tecrîdê birêz Abdullah Ocalanî ser de qiseykerdişêk kerd. Tecrîd 44 aşmî yo dewam keno. Semedo ke peynîya tecrîdê birêz Ocalanî ser o bêro, ma bi serran o têkoşîn kenê. Rayaumûmî yê demokratîke bi serran o vano, 'Ganî tecrîd bêro wedaritiş'. Ganî qetî tecrîdo ke birêz Ocalanî ser o bêro wedaritiş. Ma vanê wa fîzîkî bêro û qisey bikero. Hewteyê şîyaye, ma vat ke çi vano, ma pîya temaşe bikerê û bivînê. Ma no hewte zî eynî çî ancî kenê. Tecrîdî wedarnê, wa birêz Ocalan vejîyo û qisey bikero, ma pîya bivînê ka vano çi.

 

Ma amadeyê ke wezîfeyê xo ca bîyarê 

 

Ganî na babete de erey nêkewê û gamî bêrê eştiş. Ma sey DEM Partî bi serran o semedê aştîyêke bi rûmet û awankerdişê komara demokratîke berdêlê giran danê. Ez reyke bîn dîyar kena ke ewro ra tepîya eke lazimî bi bedeldayîşî bibo ma sey DEM Partî amade yê ke wezîfeyê co ca bîyarê.”