Neslîhan Kardaş

 

WAN - Cinîyê ke atolyaya kilîman ê 13 serrî verê  binê banê şaredarîya Wanî de ame akerdiş şuxilênê wina vatî: "Ma bi deyîran şuxilênê. Ma govende gêrenê. Her neqişêkê kilîman manayêke ci est ê.”

 

Binê banê Şaredarîya Bajarê Pîlî ya Wanî de 13 serrî verê atolyaya kilîman ameye akerdiş. Cinîyê atolyeye de şuxilênê, keyfweşî, xemgînî û dejê xo kilîman neqişî kenê. Layê ke pê kilîman yenê viraştiş zî ancî peşmî û bi boyax hetê cinîyan ra yenê amadekerdiş.

 

Cinîyê ke atolye de şuxilênê derheqê xebatanê xo de qisey kerdî.

 

 

13 serrîya xo ra kilîman viraznena

 

Aysel Demes 13 serrîya xo ra kilîman viraznena û vat, nê meslegî dayîke û dapîra xo ra musaya. Aysele wina vat: “Dimayê ke ez zewicyaya zî mi karê xo dewam kerd. Tîya ame akerdiş, ez ameya tîya. Nika ma 20 cinî tîya est ê. Ma vernê de rêze kenê. Ma pêro pîya tîya şuxilênê. Ma karê xo ra keyf gênê.”

 

‘Ma bi deyîran şuxilênê’

 

Gulîzar Gumuşta zî wina vat: “Ez dayîka xo ra viraştiş musaya. Roja ke ameya akerdiş, ez atolye de şuxilêna. Verê zêdeyêr cinî ameyîne la nika semedê şertê ekonomî êdî zêde kes nîno. Ma serê sibayî saete 08.00 û 09.00ine de yenê. Ma heta 17.00ine şuxilênê. Ma wextê xo weş derbaz kenê. Ma bi deyîran karê xo kenê. Ma sohbet kenê.”

 

Cinîya bi nameyê Suheyla Gumuştaş zî dîyar kerd ke viraştişê kilîman atolye de musaya û vat, pêro neqişan tîya musaya. Suheyla da zanayîş ke her neqişêk manayêke ci est o û wina vat: “Neqişê zehmet est ê. Wexto ke ma nînan viraznenê, ma zehmetî ancenê. Ez wazena pêro cinî serê linganê xo de vinderê.”