AMED - Sîyasetmedara kurde Gultan Kişanake her çend ke prosesê tepiştişî yê 7 serran biqedêna zî serbest nîna verdayîş. Avûkata aye Muzeyyen Nergîze dîyar kerd ke hukm goreyê nuqtaya bingeyîn tênêgêreno û vat ke no heq yeno binpaykerdiş û 22ine Mehkemeya Cezaya Girane ya Anraqa suc kena. 

 

Hemsereka verên ya Şaredarîya Bajarê Girdî ya Amedî Gultan Kişanake bi bahaneyê tewrê çalakîyanê 6-8ê teşrîna verêne ya 2014î bîya, 30ê teşrîna verêne ya 2016î de ameye tepiştiş. Her çend ke prosesê tepiştişî yê 7 serran biqedêna zî serbest nîna verdayîş. Avûkatê Gultane ra yew Muzeyyen Nergîze derheqê babete de qisey kerd.

 

Seba muracato ke ameyo kerdiş cewab çin o

 

Muzeyyene da zanayîş ke prosesê makul ê tepiştişê Gultane de bîyo û wina vat: “Sere de ma vat tepiştişê Gultane bêhuqûqî yo. Ma muracat de vat ke ganî Gultane nêra tepiştiş. Gultane hema zî tepişte ya. No tepiştiş bêhuqûqî yo. Prosesê tepiştişî yê azadî pir bîyo. Ganî bi lezkî serbest bêra verdayîş. 25ê teşrîna verêne de ma muracat kerd la her çend ke 12 roje derbaz bibo zî hema cewabêk nêameyo dayîş.”

 

 ‘Ma do muracatê DMMEyî bikerê’ 

 

Muzeyyene dewamê qiseykerdişê xo de dîyar kerd ke semedo ke cewabêk seba muracatan nêameyo dayîş do reyna muracat bikerê û no muracat zî 6ê Teşrîna Peyêne de bêro kerdiş û wina vat: “Ma vat ganî tepiştişê Gultane newe ra bêro ercnayîş. La ne mehkema desturê bingeyîn û ne zî 22ine mehkemaya cezaya girane ya Anqara qerarêk derheqê babete de nêdayî. Eke ma netîceyêk nêgîrê ma do mracatê DMMEyî bikerê. Tirkîya goreyê qanûn û mehkemaya berzî tênêgêrena. Dewamkerdişê tepiştişê Gultane bêhuqûqî yo. Hetê ci yê qanûnî çin o. Muracatê ma do dewam bikerê.” 

 

 ‘Seba rayaumûmî veng’ 

 

Muzeyyene tewr peynî ard ziwan ke tepiştişê Gultane hêrişêk vera heqê cuye yo û wina peynî kerd: “Sey cinîyêke, sey hemserekêke, sey şaredarêke ameye tepiştiş. Coka ra têkoşînê seba Gultane seba heqê cuye yo. Ma venga rayaumûmî kenê ke bê veng nêmanê û her kes ganî hetê xo de zor bido û seba serbestverdayîşê aye têkoşîn bikero.”