AMED - Li Amedê jinên TJA'yî bi dirûşma "Qeyûm ji Kurdistanê derkeve" heta Şaredariya Sûrê meşiyan û peyama ku ew ê berxwedanê berfireh bikin dan.

 

Tevgera Jinên Azad (TJA) piştî eşkerekirina deklerasyona 25'ê Mijdarê bi pankarta "Komkujiya jinê siyasî û îdeolojîk e" meşiya. Aktîvîstên TJA, Berdevka Meclîsa Jinê ya Partiya Wekhevî û Demokrasiyê ya Gelan (DEM Partî) Halîde Turkoglu û Berdevka Meclîsa Jinê ya Partiya Herêmên Demokratîk (DBP) Bêrîvan Bahçecî beşdarî meşê bûn.

 

Wan tu astengî nas nedikirin

 

Endamên TJA'yê bi tilîlî û çepikan ji Qesra Îskender Paşa heta Şaredariya Sûrê meşiyan. Di meşê de dirûşmên "Jin jiyan azadî" û "Qeyûm ji Kurdistanê bicehime" hatin berzkirin. Hewl hat dayîn pankarta jinên ku ji aliyê polîsan ve hatin astengkirin bê desteserkirin. Jinên ku destûr nedan hewldana polîsan a astengkirinê, bi pankarta "Komkujiya jinê siyasî û îdeolojîk e" meşa xwe berdewam kirin.

 

'Em bi tundiya mêr-dewletê re rû bi rû ne'

 

Jinên ku hatin Şaredariya Sûrê li wir daxuyanî dan. Berdevka Meclîsa Jinan a DEM Partiyê Halîde Turkoglu di daxuyaniyê de axivî û got, “Têkoşîna me ya li dijî tundiya dewleta mêr berdewam dike. Îro em bi tayînkirina qeyûman bi tundiya mêr-dewletê re rû bi rû ne. Sîstema azadiya jinê ya ku me di rêveberiyên herêmî de afirandiye, pergala jinan a li dijî tundiya mêr têdikoşe ava kiriye. Dixwazin dengê têkoşîna jinan qut bikin."

 

'Em ê qeyûman bişînin'

 

Halîde Turkoglu, anî ziman ku têkoşîna bi rûmet a gelê Kurd ji aliyê qeyûman ve tê hedefgirtin û got, “Em pêkanînên qeyûmê tayînî Êlih, Mêrdîn, Esenyurt, Xelfetî û Colemêrgê hatine kirin qebûl nakin. Em qeyûmê tayînkirî bi ti awayî qebûl nakin. Ji ber ku ew karmendên dewletê ne. Karmend, herî zêde, erkên burokratîk pêk tînin, lê mecbûr in ku daxwazên gel pêk bînin. Yên ku vê îradeyê talan dikin, îradeya gel, jin û ciwanan a xwe bi rêve bibin qebûl nakin. Em ê têkoşîna xwe ya ji bo jiyana azad û wekhev berfireh bikin."

 

'Em ê ji bo jiyanek bi rûmet û wekhev têbikoşin'

 

Em qeyûman qebûl nakin. Em ê qeyûman bişînin. Em ê hemû mafên xwe yên demokratîk bikar bînin da ku di siyaseta Tirkiyeyê de tiştekî bi navê qeyûm tunebe. Têkoşîna jinan a ji bo wekheviyê tê înkarkirin. Dibe ku vê ferz bikin, lê gel bi sedsalan bi têkoşîna wekhevî û azadiyê hatiye heta roja îro. Ji niha û pê ve divê tu kes nikaribe me neçar bike ku em mîna koleyan bijîn. Em ne koleyê kesî ne. Ji niha û pê ve em ê ji bo jiyanek bi rûmet û wekhev têbikoşin."

 

Daxuyanî bi dirûşma "Jin jiyan azadî" û tilîliyan bi dawî bû.