Elfazî Toral

 

STENBOL - Munevver Ecera 65 serrî ya ke 12 serrîya xo de dest bi deştişî kerd, 53 serrî yo bêmabêne dewam kena. Munevver Ecer pêwa krîzê ekonomî, koçberî û emrê averî, cuya xo bi keda xo domnena û wina venga cinîyan dana: "Linganê xo ser o bivinderê."

 

Munevver Ecera 65 serrî semedê şertê ekonomîkî Kerboranê Mêrdînî ra koçê Stenbolî kena. Temamîya cuya xo bi zor û zehmetîyan dir rî bi rî yena û pêwa nê bi keda xo lingan ser o vindena. 12 serrîya xo de dest bi deştişî kena, 14 serrîya xo de yena zewicnayîş û 11 tutan pîl kena. No 13 serrî yo Stenbol de terzîtî kena û debara xo kena.

 

Munevver Ecer derheqê cuya xo JINNEWSî rê qisey kerd.

 

'Ez bi hewldayîşê xo musaya'

 

Munevver Ecer va ke emrêk qijî de deştiş musaya û wina dewam kerd: "Ez 12 serrîya xo ra deştiş kena. Wexto ke qij bîya makîneyê ma çinbî. Mi qumaş dayîne verê yewbînan û bi destan deştêne. Dimayê nê mi makîneyêk semedê xo girewt. A roje ra yo ez cilan derzena. Ez bi îmkananê xo na xebate musaya."

 

'Pêwa heme zehmetîyan mi azadîya ekonomîya xo bidest kerd'

 

Munevver Ecer dîyar kerd ke wexto ke dewe de ciwîyayîne binê şertê giranan de xebate kerdêne û va: "Keda cinîye nêyena dîyayîş. Dewe de ma peme kom kerdêne. Mi şiwanî kerdêne. Mi hem tutanê xo rê ewnîyayîne hem xebata keyeyî kerdêne. Bi şew û roj ma xebate kerdêne. Xebata ma giran bî. Nika hewte ra 6 rojan xebate kena. 08.00ine ra heta nika 19.00-20.00ine xebate kena. Mêrdeyê mi pîr o nêeşkeno bixebitîyo. Ez tutanê xo, tornanê xo rê ewnîyena."

 

Venga têkoşîn û piştîdayîşî

 

Munevver Ecer wina qedêna: "Semedê krîzî ma nêeşkenê qumaşê neweyî bigerê. Verê xebata ma zaf bî. Êdî hêzê mi qîm nêkeno. Mi bi parçeyê qumaşê atolyeyê tekstîlî ardêne cilan deştêne û rotêne. Mi qumaşê eşteyan ardêne cilan deştêne. Lazim o ke cinî linganê xo ser bivinderê. Ez venga heme cinîyan kena. Têkoşîn bikerê û mîyanê piştîdayîşî de bibê. Kênayê mi û veyvê mi zî sey mi bi hêz ê. Linganê xo ser o vindenê."