RIHA - Birincê Qerecedaxî de bi keda cinîyan yeno sofre ser, polîtîkayê bêtêduştîye ya hemverê cinîyan xo erdê birincî ser o zî mojneno. Cinî bi hezar TL, mêrdeyî bi hezar û 500 TL rojane yenê şuxilnayîş.

 

Birinc wareyê awe yê qerexê Qerecdaxî yê qezaya Sêwregî ya Rihayî de yeno çinayîş, bi keda cinîyan yeno sofre ser. Birincê ke wareyê awe de yeno çinayîş şertê xebata ci zehmet o. Cinî ke erdê birincî de xebate kenê zehmetîyanê pîlî ancenê, pêwa cinîyan, tutê ke nêşinê dibistane zî erd de cayê xo gênê.

 

Polîtîkaya bêtêduştîye ya hemverê cinîyan xo erdê birincî ser o zî mojnena. Pêwa ke xebata giran cinî kenê, rojaneyê înan goreyê mêrdan kêmêr o. Cinî bi hezar TL, mêrdeyî bi hezar 500 TL xebate kenê.

 

Cinî ke erdê birincî de xebate kenê zor û zehmetîyanê ke ciwîyenê qal kerdî.

 

Prosesê çînayîşê birincî

 

Xiznê Işik qalê prosesê çînayîşê birincî kerd û wina va: "Dimayê çînayîşê birincî ma awe danê. Eke rind nêro awdayîş berardîş zî rind nîyo. Dima ra ma cayêk de kom kenê. Ma wareyê dîyarkerdeyî de kom kenê. Dima ra ma şirawenê fabrîka."

 

'Ma hemverê keda xo nêgînê'

 

Xiznê Işik eşkera kerd ke sey cinî hem keye de hem erd de xebate kenê û nê çî va: "Çi heyf ma hemverê keda xo nêgînê. Cinî bi hezar TL, mêrdeyî bi hezar û 500 TL gênê. No bêtêduştî û bêedaletîyêk pîl o. Xebata ma ya mêrdan zehmetêr a. Ma her wext xebata barkerdişî kenê. Ê tena cayêk kenê. Dimayê erdî ma keye de zî xebate kenê."

 

'Ameyoxê ma kesî çin o'

 

Cinîya bi nameyê Gewrê Işik zî bale ant problemanê ke cinî ancenê û wina dewam kerd: "Ma erdê ke înan ra vanê 'merde birincî' de çînenê. Mêrdeyî ma ra zêdeyêr rojane gênê. La ê yew xebate kenê. Şinê keye nişnenê ro. Ma cinî erd de xebate kenê, şinê keye heywanan dir eleqedar benê, werd viraznenê. Tutan ra ewnîyenê. Ma tutanê xo xo dir anê erd. Ameyoxê ma kesî çin o. Bi taybetî yê cinîyan. Tîya zêde kes dibistane nêwaneno."