MERKEZÊ XEBERAN- Rojnameyê Azadiya Welat hûmara xo ya 37. de manşetê kirmanckî “Mifte Azadîya Rayberî ya” ard vernî. Rojname seba averşîyayîşê prosesê haştî bale anta muhîmîya azadîya fîzîkî ya Rayberê Şarê Kurdî Abdullah Ocalanî ser o.

 

Rojnameyê Azadiya Welat no hewte roportajo ke bi kirmanckî avûkat Bunyamîn Şekerî reyde kerdbî, kerd manşet. Avûkat Bunyamîn Şekerî bale anta muhîmîya pêdîyayîşanê rî bi rî û azadîya fîzîkî ya Rayberê Şarê Kurdî Abdullah Ocalanî ser o. Şekerî dîyar kerd ke seba ke haştî û komelo demokratîk aver şêro, ganî Rayberê Şarê Kurdî bi hewayêko fîzîkî azad bibo û heme temsîlkarê komelî ey reyde pê bivînê.

 

Rojname rîpelê manşetî de ca da nuşteyanê nê nuştoxan zî: nuşteyê Rifat Ronîyî yê derheqê muhîmîya ziwanî de, nuşteyê Mulkiye Bîrtane yê derheqê 1001 îmzakaran de, nuşteyê Heqî Boltanî yê derheqê averşîyayîşanê Îranî de, nuşteyê Gelawêje Ewrîn yê derheqê mesajê Rayberê Şarê Kurdî Abdullah Ocalanî yê seba PJAKî de, nuşteyê Felemez Ulugî yê derheqê Wezîfeyê Gamanê Pratîkan de, nuşteyê Sîyamed Sîpanî yê derheqê averşîyayîşanê Kobanî de, nuşteyê Nalîne Aslan yê derheqê vîrameyîşanê şehîdan de û nuşteyê Elîxan Loranî yê derheqê vîrameyîşan de.