ŞIRNEX - Cinîyanê Botanî semedê mîtîngê ke do 28ê hezîrane semedê azadîya Rayberê Şarê Kurdî Abdullah Ocalanî Meydanê Îstasyonî yê Amedî de bi sloganê “Bi Serkêşîya azade ver bi cimatê demokratîk” pê bêro venga tewrbîyayîşî kerdî.

 

Hetê Têgêrayîşê Cinîyanê Azadan (TJA), Partîya Herêmanê Demokratîkî (DBP) û Partîya Têduştî û Demokrasîyê Şaran (DEM Partî) ra do 28ê hezîrane semedê azadîya Rayberê Şarê Kurdî Abdullah Ocalanî Meydanê Îstasyonî yê Amedî de bi sloganê “Bi Serkêşîya azad ver bi cimatê demokratîkî” mîtîng pê bêro. Yeno pabebîyayîş ke her cayê Tirkîya û Kurdistanî ra tewrbîyayîş pê bêro. Cinîyanê Botanî venga tewrbîyayîşî cinîyan rê kerdî.

 

‘Ma semedê azadîye destanê xo bidê yewbînan’

 

Hemsereka DBPyî ya Şirnexî Pinar Akil va ke no yew serre û nîm o prosesêk bi vengdayîşê Rayberê Şarê Kurdî Abdullah Ocalanî dest pêkerdo est o û va: “Ma zî semedê azadîya Abdullah Ocalanî, şarê kurdî mîtîng pê anê. Ma heme şarê Botanî dawetê mitîngê Amedî kenê. Ma semedê aştî û azadîya Abdullah Ocalanî destanê xo bidê yewbînan.”

 

Semedê aştîye tewrê mitîngî bibê’

 

Hemsereka DEM Partî ya Şirnexî Taybet Bîlgî zî va ke Abdullah Ocalan semedê aştîyêka manadar 27ê sibate de veng da û va: “Nê vengî dir proses dest pêkerd û lazim o ke şarê ma semedê serkewtişê nê têkoşîn bikero. Semedê averşîyayîşê prosesî do 28ê hezîrane de mîtîngêk pê bêro. Ma venga tewrbîyayîşî heme şarê Botanî rê kenê. Semedê aştîyêka manadar lazim o ke şarê ma tewrê mîtîngî bibo.”

 

‘Do têkoşîn bidomîyo’

 

Hemsereka DBPyî ya Cizîrî Aynûr Elçîoglu zî wina ard ziwan: “Sey cinîyêka Botanî wazena ke bi mitîngo ke do 28ê hezîrane Amed de pê bêro, gamê aştî û têduştîye bêrê eştiş. Ma nê semedî ra venga tewrbîyayîşê mîtîngî heme kesî rê kenê. Ganî ma wayîrê prosesê ke Abdullah Ocalan dayo destpêkerdiş bivejê. No di serrî yo hema gamêke nêameya eştiş. Ma azadîya Birêz Ocalanî wazenê. Heta ke azadîya ci pê nêro têkoşînê ma do bidomîyo.”