MERKEZÊ XEBERAN - Vateyê nefretî û vengdayîşê nêheqîyêk vera tewrê komelanê Elewî û Durzî yê Sûriye de nê demanê peyênan de zêde bîyê. Bi kampanyayanê ke wareyê platformanê medyayê dîjîtalî de ameyê destpêkerdene, armanc no yo ke her di komelan wareyê ekonomî û komelî de yewbînan ra bivisnê.

 

Bi kampanyayêka newe ya hashtagî ya ke 31’ê gulane de ameye destpêkerdene, waştişê birnayîşê giredîyayîşê tîcaretî û komelî yê bi welatijanê elewî û durzî ame kerdene. Kesê ke mîyanê kampanyayê de ca gênê, sûriyeyîjê ke zerre û teberê welatî de ciwîyenê ra waşt ke karsazîyê ekonomî yê elewî û durzîyan boykot bikerê.

 

Parekerdişan de eşkerayîyê cîyakar ê sey vernîgirewtişê domanan yê hevaltîya bi domananê elewî û durzîyan, dûrkewtişê silamkerdişê merdimanê nê komelan, dûrkewtişê karsazîyê înan, kirakerdiş yan zî rotîşê banan înan rê û nêdayîşê karî înan rê mîyanê xo de hewênenê.

 

Kampanya hetê derûdorê nêzdîyê HTŞ’yî ra paştî girewt

 

Her çiqas kampanyaye hetê derûdorê nêzdîyê HTŞ’yî ra paştî bigîro zî, êyê ke seba cuya pîya ya bawerî û nasnameyanê cîyayan Sûrîye de pawitoxî kenê, vera nê vengdayîşan de tesîrêk negatîf mojnayî. Bi eşkerayîyanê ke medyayê dîjîtalî ser o ameyî dayîş, ame dîyarkerdiş ke kampanyayê bi nê tewirî, cîyayîyê mezhebî teşwîq kenê, aştîya komelî xerepnenê, welat hîna zaf fînenê polarîze û problemanê mezhebî gur kenê.