Rozerîn Gultekîn

 

AMED - Berîtan Ateş derheqê xebate û armancê Komeleya "Ma Seba Ameyoxî Tîya yê" ke do 23yê Gulane de bêra akerdene qisey kerd û va: “Ma bi fikra ‘xêrcê gerrekerdişî’ senîn eşkenê çareser bikerê, veciyayî nê rayîrî. Rêxistinbîyayîş çinbo cuye nîna domnayîş. Semedê na babete zî ma heme şarê xo û ciwanan 23ê Gulane de dawet kenê.”

 

Serran o ke bajaranê Kurdistan û Tirkiya de bi polîtîkayanê şerê taybet ciwanî hedef yenê girewtiş. Bi nê armanckerdişî wazenê cimatêko goreyê xo awan bikerê. Demê peyênî de ciwanî seba afirnayîşê wareyanê ke pîya eşkenê xo îfade bikerê, têkoşîn kenê. Yew zî nînan ra Komeleya "Ma Seba Ameyoxî Tîya yê" ya ke do 23yê Gulane de bêra akerdene ya.

 

Endama komeleye Berîtan Ateş derheqê armancê awankerdişê komele û xebatanê ci de qisey kerd.

 

‘Ma bi xo bawer ê’ 

 

Berîtan Ateş eşkera kerd ke Tirkiya û Kurdistan de ciwanî bi polîtîkayanê şerê taybet hedef yenê girewtiş û wina va: “Ma bi armancê têkoşînê vera polîtîkayanê şerê taybet û xo pawitişê nê polîtîkayan ra na komele akerd. Armancê ma no yo ke ciwanî xo îfade bikerê, berpirsîyarîyê xo planê vernê de bivînê. Nifşêko ke xo nêşinasnayo, ameyoxê xo awan nêkeno yeno resnayene. Ma zî vera nê berpirsîyarî gênê xo ser û hedef kenê ke ciwanî xo bivînê. Fuhûş, tîryak Kurdistan û Tirkiya de sewîyeya tewr berz de ya. Vera nê ma awankerdişê xo îlan kerd. Ma vanê ke ‘ma eşkenê çi bikerê?’. Bêyê ke ma gerre bikerê, ma senî eşkenê çareser bikerê. Ma do biserkewê. Ma bi xo bawer ê.”

 

Do zafê atolyeyî bêrê kerdene

 

Berîtan Ateş diyar kerd ke Komeleya Kultur û Hunerî ya Amargî ya ke qezaya Sûrî de ameya akerdene xebatê kulturî rayra bena û komeleye de wareyanê zafan de do atolyeyî bêrê kerdene. Berîtan Ateş wina dewam kerd: “Komeleya Amargî hetê kulturî de perwerde dana. Hedefê ma no yo ke ciwanê bêîmkanî xo bîresnê nê îmkanan. Do atolyeyê ma yê ziwan, huqûq, ekolojî û ekonomîye bibê. Atolyeya satranc, matematîk û jîneolojîye do bibê. Ma wazenê binê banê komeleya xo de komeleyan akerê û eynî faliyetê nê qeza û bajaranê cîyayan de zî bimojnê.”

 

Seba 23yê Gulane vengdayîş

 

Berîtan Ateş wina peynî ard: “Bêyê rêxistinbîyayîş cuye nêdomyena. Semedê nê zî ma ciwan û şarê xo 23yê Gulane de tîya dawet kenê. 23yê Gulane ra dima qeydê ma dest pêkenê. 1ê Hezîrane ra dima zî ma perwerdeyê xo danê destpêkerdene. Ma her kesî dawetê komeleye kenê.”