AMED - Cinîyan dîqet ant serê na babete ke polîtîkayê qeyûman destkewtişê cinîyan hedef gênê, verê konferansê ke do menga Hezîrane de bêra viraştene ameyî têhet û mesajê "Ma do pîya famkerdişê îdarekarîya herêmî ya ke azadîya cinîyan keno armanc, pîl bikerê" dayî.

 

Heyetê Cinîyan ê Îdarekarîyanê Herêmîyan verê konferansê ke do 6-7ê Hezîrane de bi sloganê "Ma bi îradeyê cinîyan dir benê hempar, ma bi îdarekarîyanê herêmîyan cimatêko azad awan kenê" bêra viraştene, kombîyayîşêk amadekarîye viraşt. Cinîyê ke şaredarîyanê qezaya Amedî ra yê, tewrê kombîyayîşê ÇandAmedî bîyî.

 

Kombîyayîş bi deqeyêke rêzgirewtişî seba yadkerdişê merdimanê ke têkoşînê azadîye de dinyaya xo bedelnayê, dest pêkerd.

 

‘Ma do pîya îdarekarîyanê herêmîyan ê ke azadîya cinîyan esas gênê pîl bikerê’

 

Hemsereka Peyasî Bêrîvan Gulşene wina va, "Sey Komîteya Amadekar a Îdarekarîyanê Herêmîyan a Amedî, muhîmî û berpirsîyarîyê viraştişê nê pêvînayîşî ewro serê ma de yo. Ma di aşman ra zêde yo ke prosesê amadekarîya konferansê xo rayra benê. Armancê ma tenê erjnayîşê di serranê vîyarteyan o, labelê eynî wextî de pîya erjnayîşê tesîrê cimatî yê xebatanê ma yê bajarî de yo ke bingehê xelasiya cinîyan, têduştî û nêzdîbîyayîşê îdarekarîya herêmî ya demokratîke yo. Mîyanê demê di serran de, şaredarîyê ma wareyanê cîya yê ke têkildarê cigêrayîşê cinîyan, polîtîkayê cinîyan û heme yewîneyê wezîfedarî yê seba peydakerdişê xizmetguzarîye yê bajarî de xebatê muhîmî kerdî. Labelê ma zanê ke tu xebate nêeşkena xoser dînamîkanê cimatî, rêxistinanê cinîyan, toranê paştdayîşî û tecrûbeyanê têkoşînî ra bêra erjnayîş. Semedê na babete, ewro ma wazenê goş bidê çimdarî, rexne, pêşnîyaz û perspektîfanê şima; kêmasîyanê xo bivînê; û metodanê xurtkerdişê xo ser o pîya mûnaqeşe bikerê. Bi raştî, no pêvînayîş hewceyêk bî ke ma verê cû zî çimî ver de girewtbî."

 

‘Têkoşînê cinîyan pêwa qeyûman zî dewam keno’

 

Bêrîvan Gulşen Sincare wina dewam kerd: "Ma rastîyêk mîyan de yê ke ma serran o polîtîkayanê qeyûman dir rî bi rî yê. Têmîyanîyê ke serra 2016ine de dest pêkerdî û serrê 2019ine de dewam kerdî, hafizayê ma de sey pratîkanê ke îradeyê şarî hedef gênê ameyê neqşkerdene. Pêwa na babete zî, şarê ma her wext seba îradeyê xo wurza ser lingan û prosesê 2024ine dir famkerdişê îdarekarîya herêmî ya demokratîke reyna awan kerd. Labelê ma zanê ke nê hêrişî ne tenê şaredarîyan hedef girewtê. Armanckerdişêko xusûsî yê destkewtişê cinîyan, sîstemê hemserekîye û paradîgmayê xelasiya cinîyan estbî. Desteserkerdişê wareyanê cinîyan, girewtişê wareyanê cinîyan, tepiştişê bi desine hevalanê ma û prosesê dadwerî yê bi serran heme beşêk polîtîkayanê ke armanc kerdê têkoşînê cinîyan tasfiye bikerê bîyî. Pêwa na babete zî, cinîyan têkoşîn ra fek veranêda. Zafê ci sazgeh û embazê ke ewro tîya amade yê, kuçeyan de, meydanan de bîyî. No vindertişê xoverdayox bi ke hafizayê bajarî, veng û tecrûbeyê cinîyan gane vîndarna."

 

‘Vengê kolektîf ê cinîyan têkoşînî xurt keno’

 

Bêrîvan Gulşen Sincare qetî kerd ke demê neweyî yê têkoşînî do bi aqilmendî û paştdayîşê kolektîf pîya bêro awankerdiş û va, "Mîyanê nê prosesî de, ma bajaran de xebata xo kerde, pêvînayîşî viraştî û zafê kombîyayîşî yê serê polîtîkayanê cinîyan organîze kerdî. Nika, ma wazenê nê heme tecrûbeyan bikerê yew, venganê yewbînan berz bikerê û metodê têkoşînê ameyoxê pîya aver berê. Ewro, ma wazenê heqê qiseykerdişî bidê şima. Çunke têkoşînê cinîyan nê bajarî de bi hewldayîşê kolektîf, aqilmendî û paştdayîşê kolektîf bêro xurtkerdene. Tewrbîyayîş, rexne û tewrkerdişê şima seba ma zaf biqîmet ê. Ma bawer kenê ke ma do pîya têkoşînêko xurtêr û cuyêka têduştêr û azadêr awan bikerê."

 

Pêvînayîş seba çapemenîye girewte dewam kerd.