Devrîm Findik

 

STENBOL - Pispora rêxistinbîyayîşê Sendîkaya TEKSÎFyî Pembe Maden va ke cinî sektorê tekstîlî de, bêasayîş, binê tehdîdê vetişê xebate, desteştiş û meaşê kêmî de yenê xebitnayîş û va: “Yê tewr zaf keda înan yena binpaykerdiş û planê peyêne de yenê verdayîş cinî yê. Çareserîya hemverê nê rêxistinbîyayîş o.”

 

Pispora Teşkîlatî û Rêxistinbîyayîşî ya Sendîkaya Karkerê Tekstîl û Derî Sanayî ya Tirkîya (TEKSÎF) Pembe Maden derheqê tecrubeyê wareyî û têkoşînê cinîyan de qisey kerd û va ke ganî cinî sendîkayan de aktîf bibê û meydanê 1ê Gulane pir bikerê.

 

‘Asayîşê cinîyan çin o, meaşêk têduşt çin o’

 

Pembe Maden eşkera kerd ke wareyê tekstîlî de sîrkulasyonê karkeran zaf pîl o û hema vajê asayîşê tu karkerêk çin o. Pembe Maden wina dewam kerd: “Problemêk tewr qijî de karkerî xebate ra yenê vetiş. Bi taybetî zî heme cinîyan tercîh kenê. Cinîyan sey kesê ke debare kenê nêvînenê. No xelet o. Ewro bi seyine cinîyê ke bi tena sereyê xo debara keyeyê xo kenê est ê. Xeylê cinî xebatanê giran de xebate kenê la sey mêrdan meaş nêgînê. Rastê tacîz û mobîngî yenê. Semedo ke vernîya nê zordarîyan bêro girewtiş ganî karkerî xo rêxistin bikerê bibê endamê sendîkayan.”

 

‘Xoverdayîş de cinî est ê’

 

Pembe Maden eşkera kerd ke karkerê cinî cebheyê verêne yê xoverdayîşî de ca gênê la prosesê qerargirewtişê sendîkayan de xeylê ci mêrdeyî est ê û wina va: “Ma hewl danê nê sîstemî bivurnê. Sendîkayan de heyetê cinîyan yenê awankerdiş. Îdarekardişan de cinî ca gênê. La zordarîyê komelî vernîya cinîyan gêno. No zî proses zehmet keno. Ez xo ser o mîsalêk bidî. Verê sendîkayêk de xebitîyayîne, mi hemverê nê serdestîyê camêrdan de helwest girewt. Uca kahwe nîyo, sendîka yo. Keyeyê karkeran o. Cinî-camêrd ferq nêkeno, ganî semedê her kesî akerde bibo. Ez veng dana cinîyan, fabrîqeyan de bibê serkêş. Semedê kewtişê sendîkayan bibê serkêş. Karkeran rê serkêşî bikerê. Metersê. Meydanan de bê.”

 

‘Eke cinî xo rêxistin bikerê têkoşîn zî pîl beno’

 

Pembe Maden dîyar kerd ke TEKSÎFyî de endamê cinîyan zêde yê û nê ercnayîşî kerd: “Prosesê rêxistinbîyayîşî de ca girewtişê cinîyan muhîm o. Prosesêk grevî yê ke Anqara de ame domnayîş de tewrbîyayîşê cinîyan xurt bî. Heyetê cinîyan ra 50-60 cinî ameyî. Vatişanê înan ê semedê hevalê grevî de zaf bi qîmet bî. Cinî bikewê wareyê rêxistinbîyayîşî, serkewtiş zî beno. Sendîkayan de xebatê perwerdeyî yê semedê cinîyan est ê. Ma mîyanê serre de beşêk muhîm perwerdeyî rê visna.”

 

‘Sey cinîyêke mi dest veranêda’

 

Pembe Maden peynîya qiseykerdişê xo de dîyar kerd ke sîstemê serdestê mêrdan ê sendîkayan eşkeno bivurîyo û semedê nê zî ganî cinî hîna zêde têkoşîn bidomnê û wina qedêna: “Ez fabrîqeyêk tekstîlî de xebitîyayîne. Mi semedê temsîlkarîya namzedî xo pêşnîyaz kerd. Beşê ke ma uca de xebityayîne xeylê xo camêrd bî. Mi ra vatî ma rayan nêdanê cinîyan. Mi sereyê xo nêtewêna. Mi têkoşînê xo domna. Ez bîya namzet. Çimkî ganî no sîstem bivurîyo. Ma cinî biwazê her wareyî de bê ganî ma têkoşîn bikerê. Ganî ma meydanan camêrdan rê nêverdê. 1ê Gulane hetê cinîyan ra roja têkoşînî ya. Ez veng dana heme cinîyan ke ma bikewê meydanê 1ê Gulane û waştişanê xo bîyarê ziwan.”