Elfazî Toral

 

STENBOL - TJA bi armancê azadîya fîzîkî ya Rayberê Şarê Kurdî Abdullah Ocalanî û peynîkerdişê sîstemê tecrîdê Îmralîyeyî 19ê nîsane de ver bi Gemlîkî rayîrşîyayîş organîze keno. Çalakîkera TJAyî Ayşe Aksoy derheqê amadekerdişan de qisey kerd û va: “Aktorê muzakereyê aştîye Birêz Ocalan o. Aştîya Tirkîyayî azadîya Birêz Ocalanî ra vîyarena. Ma heme cinîyan rayîrşîyayîşî rê dawet kenê.”

 

Têgêrayîşê Cinîyanê Azadan (TJA) bi armancê azadîya fîzîkî ya Rayberê Şarê Kurdî Abdullah Ocalanî 19ê nîsane de bi sloganê “Demê cinîyanê azadî û azadîya Rayber Apo yo” ver bi Gemlîkî yê Bursayî rayîrşîyayîş organîze keno. Amadekerdişê rayîrşîyayîşî bêmabêne dewam kenê, cinîyan taxe bi taxe, keye bi keye zîyaretî pê anê û semedê tewrbîyayîşê rayîrşîyayîşî veng danê. Çalakîkera TJAyî Ayşe Aksoy derheqê rayîrşîyayîşê ke do pê bêro JINNEWSî rê qisey kerd.

 

‘Rîsko ke ma bikewê prosesêk zehmetî est o’

 

Ayşe Aksoy bale ant prosesê “Aştî û Cimatê Demokratîk” ê ke bi vengdayîşê Rayberê Şarê Kurdî Abdullah Ocalanî yê 27ê sibata 2025ine dest pêkerd û va ke prosesî ser o yew serre vîyart û hema dewlete gamêke nêeşta. Ayşe Aksoy wina va: “Nê prosesî de zaf hetî wayîrê prosesî û aştîye vejîyayî. Bi hemkarîya partîyê sîyasîyan û sazîyanê cinîyan no ame munaqeşekerdiş û komelîkerdiş. Ma zî hemverê nê pêvînayîşan vînenê. Nê prosesê vîyarteyî de çi heyf hema dewlete gamêke nêeşta. No zî endîşeyan zêde keno. Eke muzakere nêro kerdiş, qanûnî nêrê vejînayîş û aştîyêk manadar pê nêro, rîskê ke ma bikewê prosesêk xidarî est o.”

 

‘Ganî heqê Birêz Ocalanî bêro dayîş’

 

Ayşe Aksoy wina dewam kerd: “Vetişê şerî asan o. Serê di vatişan de şer eşkeno bêro vetiş. Zehmet aştî ya. Cinî aştîya komelî pawenê. Ma cinî wazenê ke lezkî aştî pê bêro. Semedê aştîye ganî azadîya Birêz Abdullah Ocalan pê bêro. Ganî Abdullah Ocalan bieşko xo biresno heqanê xo.”

 

Semedê rayîrşîyayîşî veng

 

Ayşe Aksoy derheqê rayîrşîyayîşê Gemlîkî de zî wina ard ziwan: “Heta ewro semedê hewldayîşanê azadîya Abdullah Ocalanî cewabê xo nêgirewtî, ma cinî wazenê bi sloganê ‘Demê cinîyan o, demê pêvînayîşî bi azadîya serekî dir o’ 19ê nîsane de Gemlîkî de rayîr ra şêrê. Xebatê ma her cayê Kurdistanî û bajarê Tirkîya de domîyenê. Xebatî do heta şewa 18ê nîsane bidomê. Ma venga tewrbîyayîşê rayîrşîyayîşê Gemlîkî heme cinîyan rê danê.”