MERKEZÊ XEBERAN - Mîyanê 24 saetê vîyarte de, netîceya hêrişan de Rojhelatê Kurdistan û Îran de 84 welatijî bî qurbanî.

 

Rêxistina Heqê Merdiman HRANA’yî bi raporêk neql kerd ke mîyanê 24 saetê vîyarte de, semedê şerê mabêne Îran û Îsraîl-Amerîkayî de, Rojhelatê Kurdistan û Îran de 84 kesî bîyî qurbanî.

 

Goreyê HRANA’yî, mîyanê 24 saetê vîyarte de 16 bajarê Rojhelatê Kurdistan û Îranî, 425 hêrişî pê ameyî.

 

Yeno vatiş ke nê hêrişan de baregehê leşkerî, baregehê supayê Pasdaran, merkezê Besîc, teyaregehê leşkerî, merkezê polîsan, depoyê neftî û binesazgehê Îranî bîyê hedef.

 

Goreyê eynî raporî, netîceya nê hêrişan de 36 welatijê sivîlî dinyaya xo bedelnayî û 48 zî birîndar bîyî.

 

Ame vatiş ke tewr zêde hêrişî bajarê Elburz, Xuzistan, Esfehan, Qezwîn û Qumî ser o virazîyayê.

 

Goreyê eynî çimeyî, roja ke şer dest pêkerdo heta vizêrî, (7 Nîsan) hezar û 710 welatijî dinyaya xo bedelnayê. Yeno vatiş ke hûmara 254 ci ra tutî binê emrê 18 serreyî de yê.