Melek Avci

 

ANQARA - Wendy Lyon bale ant rolê dîyarkerê Abdullah Ocalanî yê prosesê aştîye û qetî kerd ke proses bêtêkilîyê ci dir nêşeno aver şêro û va: “Çimkî prosesê aştîye nêşeno yew het bibo. No prosesêk pêkerdişî yo û ganî sey teslîmbîyayîşî nêro dîyayîş.”

 

Verê û dima Vengê Aştî û Cimatê Demokratîkî yê 27ê sibata 2025ine, waştişê pêvînayîşî bi Rayberê Şarê Kurdî Abdullah Ocalan dir vurîya pêlêk muracatan ke bala mîyanneteweyî ant. Semedê qetîkerdişê pêvînayîşanê ci dir zaf kampanyayê mîyanneteweyî dest pêkerdî û nê kampanyayî hema zî dewam kenê. Dima ra Vengê Aştî û Cimatê Demokratîkî, wayîrê Xelatê Aştîye ya Nobelî, avûkatê welatê cîyayan, rêxistinê heqê merdiman, temsîlkarê sîyasî û zaf aktorê komelê sivîlî, sere de Ewropayî ra, şîyî Tirkîya yan zî yewser Wezaretê Edaletî rê muracat kerdî ta ke destûrê fermîye bidê pêvînayîşê Ocalan dir û ey sey şexsêk esasî prosesê aştî û çareserîye de nasnayî.

 

No tena sey waştişêk huqûqî nîyo, la eynî wextî de sey îfadeyêk waştişê beşdarî û çimdarîya mîyanneteweyî prosesê çareserîye de vejîyeno orte, ke Rayberê Şarê Kurdî Abdullah Ocalan sey muxatabê esasî yeno naskerdiş. La pêwa nê muracatanê hîra, dîyar o ke xeylê înan hema cewabêk nêgirewtî; ne redkerdişêk eşkera û ne zî gamêk verçim ver bi qebulkerdişî nêameyo eştiş.

 

Avûkate Wendy Lyon a ke heyetê mîyanneteweyî de bî ke ameybî Anqara û muracatê zîyaretê Îmralîye kerdibî, ser rewşa muracatî de şîrove kerd.

 

Pabeyê cewabî yê

 

Wendy Lyon a ke temsîlkarîya Avûkatanê Ewropayî yê Semedê Demokrasî û Heqê Merdiman (ELDH) kena, dîyar kerd ke ê verê muracatêk pêşkêş kerdî û va: “Ma şîyî Tirkîya ke bi zaf hetanê girêdayeyê prosesê aştîye dir pêvînayîş bikerê. Bêguman, Abdullah Ocalan yew aktoranê serkêşî yê nê prosesî yo. O bi temamî aktorêk muhîm ê nê prosesî yo. Nê semedî ra, semedê ma gamêk zaf xozayî bî ke ma muracat bikerê ke ci dir pêvînayîş bikerê. Çi heyf, ma hema cewabêk nêgirewt. Waştişê ma nêame redkerdiş, la nêame zî qebulkerdiş.”

 

‘Bê ci mumkin nîyo ke proses aver biherikîyo’

 

Wendy Lyon dîyar kerd ke rolê Rayberê Şarê Kurdî û statuyê ey sey rayberê şarê kurdî bingehê waştişê pêvînayîşî pê ardo û va ke proses bêpêvînayîşî ci dir nêşeno aver biherikîyo. Wendy Lyon va: “Senîn şima zanê, Birêz Ocalan rayberê PKKyî yo û mîyanê şarê kurdî de şexsêk zaf rêzdarî yo, mîyanê temamê cimatê kurdî de zaf yeno qedirgirewtiş. Nê semedî ra, mumkin nîyo ke merdim xeyal bikero ke proses bê ci şeno aver biherikîyo. Eşkera yo ke ey rolêk pîl kay kerd. O tena Tirkîya de nîyo la seranserê Kurdistanî de zî tesîrêk pîl cimatê kurdî ser o keno. Prosesêk bêci do sey hewldayîşê caardişê prosesê Afrîkaya Başûrî bê Mandela yan prosesê Îrlandayî bê Gerry Adams bibo. Nê semedî ra, no çîyêk o ke bê ci nêyeno kerdiş. Nê semedî ra ma bawer kenê ke semedê ma zaf muhîm o ke ma bieşkê ci dir, pêwa pêro beşdaranê bînan ê ke ma înan dir pêvînayîş kenê, pêvînayîş bikerê.”

 

‘No prosesêk pêkerdîşî yo û ganî sey teslîmbîyayîşî nêro dîyayîş’

 

Wendy Lyon dîyar kerd ke hewldayîşê îdarekerdişê prosesî bi hawayêk yew hetî hema zî problemdarî yo û wina dewam kerd: “Goreyê ewnîyayîşê ma, destûrdayîşê ke o bi endamanê bînan ê cimatê kurdî, avûkatî û partîyanê bînan dir hîna zêde îrtîbat ronê semedê serkewtişê prosesî bi temamî muhîm o. Veradayîşê çekanê PKKyî xo bi xo gamêke girde ya. Nê semedî ra, selahîyetdarî hewce yê ke gamêk wina bierzê ke bawerîyêk raştîn prosesî de awan bikerê. Çimkî prosesê aştîye nêşeno yew het bibo. No prosesêk pêkerdişî yo û ganî sey teslîmbîyayîşî nêro dîyayîş. Sewbîna, no proses do serkewte nêbo. Bêguman, ma wazenê averşîyayîşêk muhîm şertanê zîndanî de bivînê.”