ÎZMÎR - Birayê Havîn Aşkane ya biguman dinyaya xo bedelnaye, Bedîrhan Aşkan wina va: “Çira merdişê waya mi biguman nêame dîyayîş û cipersayîşê lazimî nêameyî kerdiş? Çira gumanbar Îbrahîm Tektaş nêame tepiştiş. Heta ke gumanbar nêro tepiştiş û cezakerdiş, têkoşînê ma do dewam bikero.”

 

Qezaya Bornovayî ya Îzmîrî de 24ê çeleyê 2024ine de Havîn Aşkan keyeyê xo de biguman dinyaya xo bedelnaye. Çawîşê pispor Îbrahîm Tektaş ke Havîn Aşkan dir zewicîyabî, roja ke hedîse ciwîya de keyeyî gêra û îdîa kerd ke Havîn Aşkane întîxar kerda. Keyeyê Havîn Aşkane û avûkatanê înan derheqê merdişê bigumanî de sucê “bi qestî kesî kiştiş” ser o derheqê Îbrahîm Tektaşî de muracatê sucî kerdî. Dosya ke demêk dergbî averşîyayîş çinbî, rojê vîyarteyî de averşîyayîşêk newe ciwîya. Serdozgerîya Komare ya Îzmîrî, derheqê Îbrahîm Tektaşî de sucê “bi qestî cinîya xo kiştiş” ra îdîaname amade kerd.

 

Îdîaname hetê Dadgeha Cezaya Giranî ya 23ine ya Edlîyeyê Îzmîrî ra ame qebulkerdiş. Waştişê avûkatanê keyeyî yê derheqê ke Îbrahîm Tektaş tepişte bêro muhakemekerdiş ame redkerdiş. Îbrahîm Tektaş hemverê qerarê hewteyî yew rey qerekolî de îmza bierzo û tedbîrê kontrolê edlî semedê nêvejîyayîşê welatî ra ame dayîş.

 

Birayê Havîn Aşkane, Bedîrhan Aşkan derheqê mesele de qisey kerd û va ke derheqê gumanbar Îbrahîm Tektaşî de wextê ey de cipersayîş nêameybî destpêkerdiş û no ereymendiş vernîya rastîyan gêno.

 

‘Ma edalet wazenê’

 

Bedîrhan Aşkan va ke ê semedê Havîn Aşkane edalet wazenê û wina va: “No merdiş cînayet o. 24ê çeleyê 2024ine ra heta nika ma hewl danê hedîse roşn bikerê. Semedê nê hedîseyî ma zaf xemgîn ê. Pêwa dejê ma hêrsa ma zî pîl o. Yê ke waya ma ma ra girewtî, zûrê ‘întîxar kerd’ eştî orte û hewl dayî sereyê hedîse bigîrê. Waya ma cuye ra hes kerdêne. Merdimêka ke întîxar bikero nêbî. Ma destpêk ra vanê ke no cînayet o. Delîlê ke ameyî arêdayîş êdî ma piştrast keno. Ez persena; nêynûkê waya mi û lewê aye ser o DNAyê Îbrahîm Tektaş est o. Gelo çira hema delîlî kêm yenê dîyayîş? Her çî vejîyo orte, gelo çira gumanbar nîno tepiştiş. Merdişê waya mi destpêk ra biguman bî. La tu destbendkerdişêk çinbî. Gumanbar cenazeye dir bi rehetî ame Wan. La tu cipersayîşêk nêame kerdiş.”

 

Meslegdaranê xo rê veng da

 

Bedîrhan Aşkan nê çî ard ziwan: “Çira qerarê nimitişî ardî dosya ser. Şima ma ra çi nimit? Nika qerarê nimitişî wedarîya, ma ewnîyenê dosya de çîyêk çin o. Veng o. Wextê hedîse de gumanbar vernîya dozgerîye de meslegdaranê xo rê veng dano. Semedê sîyakerdişê delîlan no nêameyo kerdiş gelo? Roja hedîse cipersayîş û cigêrayîş nêameyî kerdiş. Dejê waya mi hema zî zerrîya ma de yo. Heta edalet pê nêro ma do têkoşînê xo bidomnê. Ma do bêveng nêmanê. Heta gumanbar nêro cezakerdiş ma do têkoşîn bikerê.“​​​​​​​​​​​​​​​​