Devrîm Findik

 

STENBOL - Cinîyan dîyar kerd ke Newroze hetê tarîxî de roja xoverdayîşî û têkoşînî ya û vatî ke yewîya meydanan de piştîdayîşê şorişgerî yê hemverê zordaranî ya.

 

Manaya komelî û tarîxîya Newroze emser zî hetanê cîyayan ana têhet û zemînêk xurt vecena orte. Newroza ke dînamîkê komelî û sîyasîyê cîyayê şarê kurdî meydanî de têhet ana, eynî wextî de xeta têkoşînî û vatişê hembeşî yê hetanê sosyalîstê Tirkîya de zî yeno têhet. Na çarçewa de Newroze tena roşan nîya, eynî wextî de zemînê piştîdayîşî û têkoşînî ya.

 

Çalakîkera Têgêrayîşê Cinîyanê Azadan (TJA) Sebat Karul, çalakîkera Têgêrayîşê Cinîyanê Sosyalîst (SKH) Perîhan Ozgul, Komîsyonê Cinîyanê Karkerê Kedkaran (ÎEKK) ra Îpek Bozkurt, Yenî Demokrat Kadin (YDK) ra Gulhanim Aslandogan û Piştîdayîşê Morî ra Elîf Saç derheqê Newroze de qisey kerdî.

 

‘Newroze nameyê rastîye ya’

 

 

Çalakîkera Têgêrayîşê Cinîyanê Azadan (TJA) Sebat Karul eşkera kerd ke Newroze nameyê aştîye ya û mizgînîya wisarî ya û wina va: “Merdimî dorê adirê Newroze de yenê têhet û sozê cuye danê. Ma wexto ke vejîyayîşê Newroze de ewnîyenê, sozê xoverdayîşî û yewîye dano. Sembolê Kawayê Hesinkarê ke hemverê Dehaqê Zordar sere wedarnayî ya. Nameyê Mazlum Dogananê ke zîndanî de bi hîrê kibrîtanê xo kerd adir a. Ma tîya ra nêzdî benê. Newroze Nameyê Zekîye, Rahşan, Ronahî û Berîvanan a. Nameyê rastîye ya. Ez veng dana heme şaran ke dorê adirî de yew bibê û govende bikerê.”

 

‘Semedo ke ma hêzê xo bimojnê muhîm a’

 

Çalakîkera Têgêrayîşê Cinîyanê Sosyalîst (SKH) Perîhan Ozgul zî eşkera kerd ke Newroze armancê dewamkerdişê adirê ke Kawayan tavistî hewênena û wina va: “Hewcedarîya sinifanê bindestan esta ke pê dir têkoşîn bikerê. Qelebalixbîyayîşê Newrozan zî nê semedî ra yo. Semedê ke ma hêzê xo nîşanê dişminî bidê ganî ma Newrozan de têhet bê. Ewro her wareyî de heqê ma yenê binpaykerdîş. La hema ma yewîya şorişgerî awan nêkerda. Ganî ma têkoşînê xo her wareyî de berz bikerê.”

 

‘Newroze roja têkoşînî û xoverdayîşî ya’

 

Komîsyonê Cinîyanê Karkerê Kedkaran (ÎEKK) ra Îpek Bozkurt va ke Newroze roja têkoşînê hemverê Dehaqê Zordar û temsîlkarê ci yê ewroyîna ya û wina dewam kerd: “Ma cinîyanê karker ganî meydanan de bê. Ma şertê zehmetî de xebate kenê. Cuya ma çin yena hesabkerdiş. Ma benê qurbanîyê qetilkerdişê cinîyan. AKP-MHP polîtîkayê dişminî cinîyan zêde keno. Ma veng danê heme cinîyan ke Newroze de cayê xo bigîrê.”

 

‘Ganî cinî sere wedarnê’

 

Yenî Demokrat Kadin (YDK) ra Gulhanim Aslandogan eşkera kerd ke Newroze serewedaritişê hemverê zordarî ya û wina va: “Cinî bi seserran bi şîdet, binpaykerdiş, têduştnêbîyayîşî dir rî bi rî manenê. Nê semedî ra ganî cinî sere wedarnê. Ganî cinî hemverê hişmendîyê ke înan çin hesabkenê meydanan de bê. Ma sey YDK do meydanan de bê.”

 

Endama Komeleya Piştîdayîşê Morî Elîf Saç zî dîyar kerd ke çîyê ke înan beno Newroze pawitişê têduştîya şarê Tirkîyayî ya û va ke sey Piştîdayîşê Morî bi felsefeya “Jin, jiyan, azadî” do 22ê adare de Yenîkapîyê Stenbolî de bê.