Rojda Aydin 

 

AMED – Dewa Arzoxlî ke wazenê GES ci de bêro viraştiş reaksîyonê roniştoxan dewam keno. Cinîyê Arzoxlî dîyar kerdî ke eger na proje bêro viraştişî cuyayîş û herra înan nêmano û waştiş kerdî ke na proje bêro betalkerdiş.

 

Dewa Arzoxlî yê qezaya Sûrî ya Amedî, ZENKAR-1 wazenê ke santralê enerjiya pirrî (GES) virazo. Sewbîna wazenê Xirapbajar heta Newala Gura GES bêro viraştişî. Labelê Xirapbajar wayîrê cayêk arkeolojîk zî yo. Eynî wextî de derheqê ZENKAR-1 de sîteyê Qeymeqemîya Sûrî de 31ê Gulana 2024ine de nê ameyî vatene: “Goreyê maddeyê 14ine ê Rêziknameyî erjnayîşê ÇED’î, derheqê projeyê ‘SANTRALÊ ROJE YÊ ZENKAR-1’ de Wezaretê Derûdorî, Bajarwanî û Vurnayîşê Îklîmî qerarê ‘Erjnayîşê Tesîrê Pozîtîfî yê Derûdorî’ da.”

 

Sewbîna ame zanayîş ke tenya projeyê ZENKAR-1 çin o, eynî wextî de projeyê ZENKAR-2 zî wazenê eynî cayî bêro viraştiş. Semedê betalkerdişê ZENKAR-1 dewa nika şûrayê dewlete de ya û derheqê ZENKAR-2 de zî prosesê qanûnî dest pêkerd. Sewbîna Şaredariya Sûrê zî do raporêk amade bikero ke cayê yeno waştiş bikerê wareyê sîtî.

 

Hemverê hewldayîşê viraştişê GES’î reaksîyonê roniştoxê Arzoxlî dewam keno. Cinîyê Arzoxlî destnîşan kerdî ke eger no proje bêro viraştişî cuyayîş û herra înan nêmanena.

 

‘Cuyayîşê dewa ma do çin bikerê’

 

Remziye Gunerî reaksîyon nîşan da talankerdişê xoza ser o û va: “Ma nêwazenê dewa ma de GES bêro viraştiş û heme roniştoxê dewe nêwazenê. Heta gonî bedenê ma de bibo û ma sax bê ma do destûr nêdê GES tîya virazîyo. Ma dewe de debara xo bi pesdewarî û ramitişî kenê. Heqê înan çin o ke nê çî dewa ma rê bikerê. Zilm ma rê kenê. Ma hamnanî dewa xo de îsot, firingî, zebeş, garis û xeylêk çîyê bînî raminenê. Eger bêro viraştiş ma do nêeşkê êdî ramitiş bikerê û heywanan rê biewnê. Na proje ke wazenê dewa ma virazê zirar dano cuyayîşê ma. Eger bêro viraştişî tenya hetê cuyayîşî de, eynî wextî de hetê ekonomî de zî tesîrêk negatîfî ma rê keno. Cuyayîş nêmaneno. Şarê ma semedê germbîyayîşî do mecbur bimanê fek dewa xo ra verabido. Labelê ma hemverê nê de, semedê fek dewa xo ra veranêdê û bipawê ser lingan de yê. Ma do heta peynî hemverê nê vejîyê.”

 

‘No proje do zirar bido cuyayîş û dewa ma’

 

Emîne Eren zî destnîşan kerd ke ey nêwazenê dewa înan de no proje bêro viraştiş û dîyar kerd ke no proje zirar dano cuyayîş û dewa înan. Emîne Eren wina dewam kerd: “Ma nêwazenê no proje dewa ma de bêro viraştiş. Tenya dewa ma de nê, ma nêwazenê tu cayî de zî bêro viraştiş. Debara na dewe pesdewarî û ramitişî ser o. Eger ewro dewa ma bêro viraştiş, siba dewa ke hemverê ma de ya zî virazê. Ma heme hemverê nêde yê. Eger ez ewro pesdewarî nêkerî tut û cîranê mi bikerê. Ma nêwazenê bêro viraştiş. Vengdayîşê ma selahîyetdaran rê oyo ke wa nê projeyî bidê vindarnayîş. Ê semedê menfeetê xo wazenê nê projeyî virazê. Heta peynî ma do wayîrê dewa xo vejîyê.”

 

‘Têkoşînê ma semedê vindarnayîşê projeyî yo’

 

Şemsîye Çîftçî wina ard ziwan: “Waştişê ma heme roniştoxê dewe yew o; wa no proje dewa ma de nêvirazê. Wazenê proje tîya virazê. Tîya debara ma bi pesdewarî û ramitişî ya. Sewbîna tu karê bînî çin o ma ci de bixebitîyê. Sewbîna na herre herra cuyayîşê ma ya. Ma fek herra xo ra veranêdanê. Ma do destûr nêfê nê çî. Wa peynîya nê zilmî bêro. Wa no proje bidê vindarnayîş. Têkoşînê ma zî semedê nê çî yo. Tenya roniştoxê dewa ma nê, eynî wextî de roniştoxê dewanê dora ma zî nê çî nêwazenê. Ganî heme kesî hemverê nê de bibê yew.”