Derya Ren

 

RIHA - Edlê Bekir ya bi vatişê ‘Ma mergî ra pîlêr ê’ bîrê merdiman de ca girewte, dîyar kerd ke krîzê Kobanê dewam keno û wina ard ziwan: “Wayîrê Kobanê vejîyê. Her roje krîzê merdimî giranêr beno. Ganî korîdor û berê sînorî bêrê akerdiş.”

 

HTŞ, DAIŞ û çeteyê cîhadîst yê girêdayeyê Tirkîya 20ê çeleyî ra Kobanê binê ablûqa kerdê û nifûsê nîm mîlyonî yê bajarî bi krîzê merdimî yê giran dir rî bi rî yo. Sere de şarê Kobanê, heme şarê dinya semedê derbasbîyayîşê hetkarîye merdimîye, venga akerdişê korîdorê merdimî û Berê Sînorî yê Murşîtpinarî kenê.

 

Heto bîn ra Platformê Bajarî yê Amedî dîyar kerd ke xêrcê 25 TIRî hetkarîye, 20 TIRî hetkarîya merdimî embaran de yenê vindarnayîş û va, rewşa verê sînorî bêro akerdiş de do nê hetkarîyan zî bişirawê.

 

Edlê Bekir ya xoverdayîşê Tişrînê de bi vatişê ‘Ma mergî ra pîlêr ê’ bîran de cayê xo girewte, derheqê rewşa peyên a Kobanê de ajansê ma rê qisey kerd.

 

‘Ma fek dewaya şehîdanê xo veranêdanê’

 

Edlê Bekir eşkera kerd ke 7 serre ra heta 70 serre her kes semedê bajarê xo bipawo wareyan de yo û va: “Ma nêtersenê. Ma piştê şehîdanê xo de yê. Bala her kesî HSD û YPJ’î ser o. Ma zî sey Hêzê Asayîşê Zereyî, ma do pawitişê şarê xo bikerê. Şarê ma nêterseno. Çi beno wa bibo şarê ma helwestê xo dayo orte. Roja hêrişî dest pêkerdê ma wareyan de yê. Ma bi çekanê xo pawitişê xo kenê. Her kes hemverê hêrişan vindertişêk pîl dano. Ne tankî, ne topî, tu çî nêeşkeno ma rê game peyser bido eştiş. Teyşanî û vêşanî nêeşkeno ma dir peyser game bido eştiş. Hêzê ma est o. Ma eşkenê bikerê. Kobanê cayê xoverdayîşî yo. Sembol o. Her kes nê prosesî de bi Kobanê. Ma dest dewaya şehîdanê xo ra veranêdanê.”

 

‘Serkewtiş do yê ma bo’

 

Edlê Bekir dewamê qiseykerdişê xo de dîyar kerd ke serkewtiş yê Rojawanî bo û wina dergî da: “Ma Kobanê, keleya xoverdayîşî heme şarê xo yê xoverdayoxî silam kenê. Serkewtiş yê ma yo. Kobanê de krîzêk ke yeno ciwîyayene est o. Ganî no bêro dîyayene. Dermanî kêmî yê. Lazimîyê tutan est ê. Problemî dewam kenê. Ganî korîdor û berê sînorî bêrê akerdiş. Wwzenê bi ambargoyî bêtesîr verdê. Ma nê qebûl nêkenê. Ma heta peynî têkoşîn bikerê.”

 

‘Wayîrvejîyayîş est o labelê qîm nêkeno’

 

Edlê Bekir venga heme çar hetê Kurdistanî kerd û wina va: “Wayîrê Rojawan û Kobanê vejîyê. Belê peymanêke est a. Labelê hema na peymane nênişta ro. Hetê dermanan de problemî est ê. Nêweşê kanser û diyabetî est ê. Dermanê înan nînê peydakirdiş. Ganî no problem bêro çareserkerdiş. Ganî şarê ma yê Ewropa wayîrê serekî, şar û welatê xo vejîyo. Ganî bikewê wareyan. Çi beno wa bibo ganî bêveng nêmanê. Ganî ma şarê kurdî wayîrê yewbînan vejîyê. Wayîrvejîyayîş est o labelê qîm nêkeno. Ganî mi bi yewîye vengê xo berz bikerê. Ganî tu kes bêveng nêmano. Roj bi roje krîzê merdimî giranêr beno. Ganî berê sînorî û korîdorî bêrê akerdiş. Ganî dinya hemverê çîyê Kobanê de yenêkerdiş bêveng nêmano.”