Buşra Turan

 

WAN - Dayîka Aştîye Zekîye Kaya derheqê komployê mîyanneteweyî de qisey kerd û va: “Heta serekê ma azad nêbo ne şarê kurdî ne şarê tirkî azad nêbeno. Ma venga heme kesî kenê ke hemverê komployî bikewê wareyan.”

 

Dimayê komployê mîyanneteweyî yê 15ê Sibate 1999ine yê hemverê Rayberê Şarê Kurdî Abdullah Ocalanî ser o 27 serrî derbas bî. Tecrîda giran ê Abdullah Ocalanî ser o dewam keno.

 

Dayîka Aştîye Zekîye Kaya derheqê komployî de qisey kerd û dîyar kerd ke sey meclîsê dayîkanê aştîye bi serran o têkoşîn kenê û armancê înan awankerdişê aştîye yo. Zekîye Kaya eşkera kerd ke heta Rayberê Şarê Kurdî Abdullah Ocalanî azad nêbîyo şarê kurdî zî azad nêbeno. Zekîye Kaya wina va: “Ma bi serran o semedê azadîya serekî xebatan dominenê. Armancê ma aştîye ya. Ma semedê aştîye têkoşîn kenê. Ma xo berpirsîyar vînenê. Ma 15ê Sibate lanet kenê û reyke bîn veng danê. Êdî bes o. Ganî gamê somutî bêrê eştiş.”

 

‘Ma heta peynî têkoşîn bikerê’

 

Zekîye Kaya eşkera kerd ke ê her serre hemverê komployî çalakî û bername pê anê û va pêwa heme tedayî dest têkoşînî ra vera nêdayî û do vera nêdê, heta peynî têkoşînê xo bidomnê. Zekiye Kaya wina ard ziwan: “Bi serran o teda Dayîkanê Aştîye rê yeno kerdiş. Binpaykerdişan dir rî bi rî yenê. Labelê pêwa heme çî ma têkoşînê xo domnenê. Pêwa heme dejan ma veng danê. Waştişê ma yê hempar o yo ke nê dejî peynî bibê û nê merdişî peynî bibê. Dem demê têgêrayîşî yo. Heta ke serekê ma azad nêbo ne şarê kurdî ne şarê tirkî azad nêbeno.”